Odokotela bakhuthaza abazali abalabantwana ababulawa ngumkhuhlane we-hernia lozulu nje jikelele ukuba bayedinga usizo ezibhedlela ngoba umkhuhlane lo uyelapheka.
Abezempilakahle bathi kulabantwana abanengi eZimbabwe abahlaselwa ngumkhuhlane lo, wona oziveza ngendlela ezitshiyeneyo ezigoqela ukuvuleka kwenkaba lokuphumela ngaphandle kwezitho zangaphakathi ezifana lamathumbu.
Imikhakha yalumkhuhlane emibili evame kakhulu kuleli yi-inguinal hernia le-umbilical hernia, yona elatshwa ngokuhlinza isigulane, isurgery, kulungiswe lapho okuyabe konakale khona.
Kodwa umuntu engaphuzelwa ukuhanjiswa kubodokotela ulakho ukufa.
UDokotela Wedu Ndebele uthe, "Umkhuhlane we-hernia ulakho ukwenzakala esibhonweni lasenqulwini, kuyikhuphumela phandle kwamathumbu sokusiya ngokuthi aphume njani kodwa uma ephuma ebuyela ikakhulu enkabeni njalo uma kusenzakala emntwaneni omncane kulakho ukuthi kuyabe kuzavaleka kodwa engakhula ulakho ukuhlinzwa abuyele endaweni yawo."
Loba nje isifo lesi sivame kakhulu ebantwaneni, silakho njalo ukuhlasela abantu abadala.
UNdebele uqhubeke echasisa esithi, "I-hernia ebakhona enqulwini kummele ivalwe masinya. Kungabangelwa yikuthi umuntu azalwe elayo kuthi ebadaleni yikuthwala izinto ezinzima njalo iyelapheka."
Isakhamuzi sakoBulawayo uNkosikazi Sinothile Nkiwane utshele iStudio 7 ukuthi ulendodana eyelatshwa lumkhuhlane.
"Indodana yami ibilehernia kodwa sihambe empilo wahlinzwa usedlala kuhle labanye ngoba ngesikhathi evuvukile enkabeni wayekhala kokuphela kungasaphileki," kutsho uMaNkiwane. "Ngikhuthaza omama ukuba bedinge usizo.kusasemasinya baye ezibhedlela hatshi ukuhlalela umkhuhlane."
Omunye oke waba le-hernia kodwa welatshwa wasila nguMnu Nkululeko Mguni.
Uthe, "Ngo-2019 ngahlinzwa ngemva kokubalebhundu ngaphansi kwesisu. Amathumbu ayephumile kusaka elehlukanisa amathumbu lebladder. Ngahlinzwa babuyisela amathumbu endaweni yawo njalo ngangingezwa buhlungu."
Odokotela bathi kumele abantwana bahlolwe sonke isikhathi ukuze baphangiselwe ukwelatshwa nxa uthe watholakhala lumkhuhlane.
Ukwelapha isifo lesi eZimbabwe kubiza amadola aseMelika aphakathi kwamakhulu amane kusiya kwayisithupha, US$400 to US$600.
Ngenxa yokudula kwenhlawulo le, ugatsha lukahulumende olubona ngezempilakahle luvame ukwelapha abantu mahala lusebenza lenhlanganiso ezizimeleyo ezifana leCure Zimbabwe, Zimbabwe Medical Association kanye logatsha lweUnited Nations olubona ngenhlalakahle yabantwana olweUNICEF.
SEE ALSO: Udaba Siluphiwa nguAnnastacia Ndlovu.