Abenhlanganiso ezehlukeneyo koBulawayo bahlangene labasakhulayo ikakhulu amantombazana phansi kombuthano weIntwasa Festival. Injongo bekuyikuxoxisana ukuthi kungenziwani ukumisa imitshado yabantwana besese bancane kanye lemicimbi yama Vuzi.
Okuphume emkhosini weIntwasa Festival kuveze sobala ukuthi umzali ulo mlandu omkhulu kulokhu ngoba abatsha bengatshabalala nxa umzali engasukumanga wamisa ububi lobu.
Umnumzana Nkosi Mlibazi ongumbalisi uthi umtwana kumele akhule phakathi komthetho ukuze isizwe singatshabalali.
“Umlandu ukithi ebazalini, thina sisakhula sasilemithetho eqinileyo emakhaya. Ilanga lalithi litshona umtwana ebe sendlini kodwa sikhulile thina sathi abazali babesincindezela emuva sanika abantwana bethu inkululeko enkulu ukuthi bafike endlini ngezikhathi zabo, imali yithi esibanikayo abantwana ukuthi bangene e town bezijabulise.Sesithatha kakhulu imithetho evela ebalungwini ebehlulayo ukuthi umtwana kasathintwa seliqanda, kodwa isintu sithi umtwana ngowomuntu wonke. Umntwana kumele akhule phakathi komthetho ukuze isizwe singatshabalali,kumele sisebenzise amasiko obuntu.”
Umqondisi wenhlanganiso yabatsha eye Youth Ahead, umnumzana Everson Phiri uthi kuyadingeka ukuthi kuvulwe indawo ezilenhlelo zokujabulisa abatsha balamuhla hatshi abaka 1960.
“Zinengi izinto esezenziwa lamuhla ezekelelwayo, siyakwazi ukuthi abantu abatsha bayaganga ngama Vuzu party kodwa kumele siyikhangele kabanzi lendaba ukuthi ivela ngaphi, isuka ngaphi.Abantu abatsha bathi abala ndawo abangahamba kiyo ukuthi beyezikholisela.Abanye abadala bake bathi kanti ke ukuya kuma Youth Centre kuyalani, thina sithi akusela zinto ezisichazayo lapha. Ukuze kulungisiswe lindaba yama Vuzu party kuqhakathekile ukuthi sikhangele ukuthi sivule izindawo zabantu abatsha abangabuya bezo kwejisela khona, ama Youth Centre nxa siwavula ebe zindawo ezichaza abantu abatsha balamuhla hatshi abaka 1960.”
Untombazana osakhulayo, u Alice Moyo uthi udubo yikuthi inengi labo sebehlala bodwa, abazali besemazweni besebenza.
“Mina ngibona engazani ukuthi ukuze ku ender ama child marriages, abazali kufuze bekele abantwana beqede esikolo,bafunde benze into abafuna ukuba yiyo.As for ama Vuzu, abazali kufuze ba protector abantwana , nxa umtwana engaphuma babe kwazi ukuthi ulobani njalo wenzani.Indaba yokuthi abantwana bahlala bebodwa these days , ngoba abazali bephume elizweni behamba ukuyadinga ama greener pastures and i solution engaba khona yikuthi i economy ingaba ngcono abazali bangahlala labantwana babo , bethole imisebenzi.”
Omunye wabatsha uNomazulu Dube yena ukhuthaza ontanga ukuthi batshiyane lemicimbi yama Vuzu ngoba kulapho abacina belingwa ukungena ezintweni ezingaqondanga.
“Into engiyifundileyo lamuhla engithuthukisileyo yikuthi yindaba yama Vuzu parties ukuthi kumele sekele ama Vuzu parties coz sithola into ezimbi, imithwalo emibi coz nxa sihamba khonangale sizafuna ukuthi utshwala, ama drugs,sicine sesi raped singene entweni ebekungamelanga singene kizo, ngakho kumele sitshiye ama Vuzu Parties. Nxa kungani sekuhlupha ngcono kube lamanye ama entertainment azasenza ukuthi sicine singasahambi kuma Vuzu parties.”
Inhlanganiso ezehlukuneyo bezilamantombazana asakhulayo, zikhankasela ukumisa imitshado yabantwana kanye lemicimbi yama Vuzu.Kukhanye umzali elomlandu omkhulu ekumiseni lokhu njalo kudingeka ukulandela amasiko akudala ukuze kukhuliswe abatsha, kukhule isizwe. Okunye okuvele lapho yikuba kumele kwakhiwe indawo zokukholisisa abantu abatsha balamuhlanje ukuze bengaze baye kulokhu okungaba lungelanga.
Kolunye udaba olukhangelane loBulawayo unkosikazi Simangele Ndiweni ongumongikazi uthi umkhankaso wendingindi uyaqhubeka emakilinika lezibhedlela zonke zaleli dolobho lezikolweni.
“Sithanda ukwazisa uzulu ukuthi umkhakhanso wokuhlaba abantwana abangaphansi kweminyaka emihlanu uyaqhubeka kuma clinics, ezikolo kanye lezibhedlela kunganani ukuthi odokotela lokhe bengekho emsebenzini.Siyaqonqosela kubazali ukuthi balethe abantwana ngoba lokhu kujonge ukubavikela hatshi ukuthi kubaphe imikhuhlane.Siyazi abanye abazali bathi abantwana babo baba lama side effects alokhu, kodwa sithi wozani konke kuyelatshwa, sithi ukwenqabela kuyinsika kulokwelatshwa.”
Abezempilakahle koBulawayo bathi umkhankhaso wokuhlaba abantwana abangaphansi kweminyaka emihlanu amajekiseni wokubavikela imikhuhlane yeNdingindi, uyaqhubeka kuyonale iviki yonke lanxa odokotela lokhe bengakabuyeli emsebenzini.
Your browser doesn’t support HTML5
Udaba lweIntwasa Festival siluphiwa nguBathabile Masuku