Abazali babafundi esabelweni seMatabeleland North bakhala ngendlela yokufundisa entsha yesiko ethulwe nguhulumende i-Heritage Based Curriculum, abathi ingwalo zayo azilotshwangwa ngolimi lweminye imihlobo oluqondileyo.
UNkosikazi Namakau Mubita ohlala eVictoria Falls uthi iHeritage Based Curriculum le, anduba iphumeleliswe kubafundi, kwakufuze ukuba aluba kwaxoxiswana lezikhwicamfundo labanye abalolwazi ngezamasiko kanye lolimi lwezinye indimi.
“Thina njengabazali asisuthiseki ngoba ikhangela, ikhulisa njalo ulimi olulodwa lwesishona itshiya ezinye indimi lamasiko azo.”
UMnumzana Nkanyiso Moyo laye uthi indimi kazilotshwe ngabantu abalolwazi olujulileyo.
“I- language kulalapha okuganyulwa khona uhlelo lwethu. Akusijabulisi ngoba abantwana lapha ababala khona akuzwisiseki. Ungamuzwa ebala uyathi udali, uthathe ibhuku ufice ubala okuku text book okungaqondanga.”
Lokhu kukhathazeka kulandela umhlangano ogqitshwe ekuqaleni kweviki le, owabaphathi bezikolo emfundweni ephansi, ababethe gwaqa eVictoria Falls ukuzocubungula i-Heritage Based Curriculum eyasungulwa ngenyanga kaNkwenkwezi lokukhangelelwe nguhulumende kubaphathi bezikolo ehlelweni lolu.
UMnumzana Akuneni Maphosa, umongameli wenhlanganiso yababalisi eyeZimbabwe Teachers Association, uthi zinengi indingeko uhulumende okufuze azifeze, okubalela iholo, ukuze i- curriculum le ibelempumela enhle.
“Umbiko ebesiwupha sikhangele isiqokoqela sohlelo lolu, sibone ukuthi okukhangelelwe umphathi wesikolo ngaphansi kwesihloko sendaba esingaso lonyaka yikuthi kumele umphathisikolo akhuliswe afakwe endaweni yakhe efaneleyo. Kumele ahlonitshwe esigabeni, ebantwaneni lasezakhamizi lapha esebenzela khona.”
UMaphosa uthi kuHeritage Based Curriculum, uhulumende kufuze abeke eceleni imali ethexaxa kwezemfundo ukuze kutholakale ingwalo, abafundisayo, izakhiwo lokunye.
“Kuzakwenza ukuthi izifundo lezi ezintsha ziphumelele. Akwakuqala kumele ababalisi bafundiswe bazwisise ukuba into le itshoni, kumele ifundiswe njani, ngubani, ngani.”
Emhlanganweni lo, uMnumzana Richard Moyo, ohola isabelo seMatabeleland North enhlelweni zikahulumende, utshele abaphathi ukuba uhlelo lwemfundo le lubalukekile.
Amazwi akhe ethulwe ngobelibamba lakhe, uMnumzana Tapera Mugoriya.
“NjengeZimbabwe abantwana kumele bazi imvelaphi yethu ukuze bayailondoloze kusasa. Ngikhuthaza lonke ukuba libafundise ngokupheleleyo uhlelo lolu.”
I-Heritage Based Curriculum eyethulwe ngemva kokwesulwa kweContinuous Assessment Learning Activities ngenyanga kaNhlolanja, kulandela ukusolwa ngabazali ukuba ingumlandu kubafunfi, kibo kanye lababalisi