Abazali babafundi esabelweni seMatabeleland North bathi sebesehluleka ukubhadalela abantwana babo imali yezifundo – ischool fees - okwenza ukuthi belotshelwe incwadi ngabaphathi bezikolo asebefuna isithunywa somthethwandaba sithathe impahla yabo okungagoqela inqola, izitulo, amatafula, izifuyo lokunye okubambekayo.
Abehluleka ukubhadala imali yezifundo bathi isomiso esikhulu eZimbabwe sibalethele inhlupho ezinengi ngoba kabazange bevune lutho nyakenye ngakho-ke imali abayitholayo isetshenziswa ukuthenga ukudla.
Omunye wabakusimo lesi nguNkosikazi Noreen Sibanda, owesigabeni seLupane, olomntwana eChinotimba Primary School, othi sedlelevalweni.
Noreen Sibanda we Lupane, ebala incwadi ayithola kuma debt collectors abangazothumba impahla yakhe loba nini
“Usehlalelile isikhathi engabhadali, saze sabhalelwa izincwadi ukuthi kusiyafika u30 July, kodwa zitholakala nzima. Vele kasikayi lokuyakhalaza ngoba siyesaba.”
UNkosikazi Sibanda uthi ulesikwelede semali efika phose amakhulu amabili amadola eMelika – US$200. Elokitshini leMkhosana sixhumane njalo loMnumzana Abija Mapfumo, laye okhala ngokufanayo kulandela ukuma kwakhe umsebenzi wokulinda kumankampani ngo2019. Laye loba nini engathathelwa impahla.
“Umntwana uyayithola ngaphi imali, angisebenzi. Kumele abeku Form 1, angilamali. I-company ebengiyisebenzela kayibhadali, so ngiphila ngokufaka ama satellite dish $10 lakho ngemonthend abantu bethutha.”
EMoringa, sixhumane njalo loMnumzana Innocent Tevedzai, okhubazekileyo, ophila ngokuthunga izicathulo.
“Akuselamali, ukuthi ubhadale irent, school fees lokudla kwabantwana sekuyinkinga enkulu.”
Uthi lenhlelo zengalo yosizo kazikho. “Thina asiholi, babuya basibhala amabizo bahamba nya babuya njalo basibhalisa kuma-loan, kodwa kasiwazuzanga.”
UNkosikazi Bekezela Sibanda owesigabeni seNkayi uthi abantwana abanengi sebetshiyile izifundo ngenxa yokuswela kwabazali.
“Izolo besazi ukuthi umntwana ongayi esikolo ngoyintandane, kodwa abanengi abasayi ngoba imali iyabe inlutshwane ukukhangela ukudla, inhambo lokwesikolo.”
Uphenyo olwenziwa yiZimbabwe Livelihoods Assessment Committee ngoNtulikazi, lwaveza ukuba abafundi abedlula amatshumi amabili lanhlanu ekhulwini - 25.2 percent esabelweni lesi kabafundi ngesizatho sokusweleka kwezimali ebazalini.
Kumaviki edluleyo, okhokhela ugatsha lwemfundo ephansi, uMnumzana Torerai Moyo, wakhuthuza abaphathi bezikolo ukuba bengaxotshi abantwana ezikolo, kodwa bephanyeke umlandu ebazalini.
Kwabangakhokhiyo, wathi abaphathi balakho futhi ukumanyana balobele idale lephalamende ukuba kubengumthetho ukuthi wonke umzali ongakhokhiyo ayemiswa phambi kwenkundla yomthetho, ajeziswe.
SEE ALSO:
Udaba Esilwethulelwe NguNokuthaba Dlamini