Abavoti beleMelika basahlolisisa ukuthi ukuzama ukubulawa kozangena kukhetho lukamongameli uMnu Donald Trump ngoMgqibelo kungaguqula ukhetho lolu kangakanani. Intathelizindaba yeVOA uScott Stearns usipha loludaba olukhangela ukuthi ukudubulwa kwakhe kutshoni elizweni kanye lakukhetho lukaLwezi.
Ukudutshulwa kukaMnu Donald Trump kwethuse abanengi kwatshiya umkhankaso wokhetho wehlukanise uzulu.
Abangena umhlangano weConvention yebandla lamaRepublican eWisconsin babuthene bekhulekela ozamela lelibandla kukhetho lukamongameli njalo besithi ukuhlaselwa kwakhe kuzakwengeza usekelo lukazulu. UMnu Harrison Musselwhite ngomunye wabakulumhlangano evela eSouth Carolina.
Umnu Musselwhite uthi, “kutshiye sonke, kugoqela umongameli Trump, sizinikele ukulwa lokunqoba. Umongameli Trump ulomoya ofana lokaWinston Churchill. Sizabalwisa kuzo zonke indawo njalo lonyaka sizalwisa size sinqobe.”
Omunye umvoti weWisconsin uMnu James Hauser uthi udlakela akufanelanga lwamukelwe kwezombusazwe weleMelika.
“Abantu balemibono yabo. Akulamuntu okufanele adutshulwe ngenxa yemibono yakhe. Yikho sivota. Kufanele sime ukudubula abantu,” kutsho uMnu Hauser.
Umvoti weMissouri uNkosikazi Amy Declue uthi ukuphepha kukaTrump kumtshiye esethandwa ngabanengi.
“Konke lokhu ahlangane lakho, ngibona sengathi kezakwengeza usekelo lwakhe. Usehlangane lokunengi kodwa ulokhu eqinile eqhubeka ngomkhankaso.”
ENew York, abavoti abakhulume leVOA batshengise ukukhathazeka ngenxa yokudutshulwa kukaTrump.
“Njengabobonke abantu, ngethukile kakhulu. Le yinto okungamelanga yenzakale eMelika. Kumele senze ngcono. Amacele onke akumelanga emukele udlakela,” kutsho uVincent.
Umvoti weNew Jersey uJohn yena uthe, “xoxisanani nxa lilemibono etshiyeneyo. Xoxisanani nxa kulokungezwisisani. Akulandingeko yokuzama ukubulalana ngenxa yokutshiyana kwemibono.”
UCindy oweNew York welekelele esithi, “angisekeli umongameli Trump. Ngisekela uJoe Biden. Ngibona sengathi amacele onke kumele ehlise umoya. Akulamuntu okumele afele imibono yakhe yezombusazwe.”
Umvoti weTennessee uNkosikazi Laura Baiger uthi ukudutshulwa kukaTrump ePennsylvania kuveza ukuthi kumele kwehliswe umoya
“Ngibona sengathi kumele sehlise ukuthukuthela. Kungani singenelisi ukuxoxisana? Kulokunengi abantu abafuthelane ngakho, njalo akula sizatho sokufuthelana konke lokhu. Kufanele sibambane, sixoxisane njalo sizwane,” kutsho uNkosikazi Baiger.
Umvoti wePennsylvania uNkosikazi Kristen Billet uthi ukudutshulwa lokhu kuveza ukuthi kulendingeko yokwengeza ukuvikelwa kukazulu.
“Ukufa kwabantu abamsulwa kuyadanisa. Kodwa ngilesifiso sokuthi kwengezwe ukuvikelwa komuntu wonke kuze kwedlule lokhu.”
EWisconsin, uNkosikazi Dawn Goodman ubona sengathi udlakela lwangoMgqibelo luzaguqula ezombusazwe weleMelika.
“Kungelani lokuthi nguBiden kumbe uTrump, ukuzama ukubulala umongameli akulunganga. Ngumuntu njengabanye, njalo abantu abadutshulwayo emhlanganweni lo, balemuli ezidinga imithandazo yethu.”
Imikhankaso kaTrump loBiden seyehlise inkulumo zayo kulandela ukudutshulwa lokhu, uTrump etshele iphephandaba leNew York Post ukuthi useguqule umbiko wakhe azawethula ngoLwesine esefuna ukugxila ekubambaniseni ilizwe.
SEE ALSO: Lalela Okugcweleyo Ngaloludaba.