Ukusilela kwamafutha ezimota sekudale ukuthi abatshayeli bemitshova bakhweze imbhadalo yokugada imota zabo besithi sebethola lawo mafutha emkambo wensitha lapho athengiswa ngentengo ephindwe kabili.
Udubo lokusilela kwamafutha ezimota luqale ngoMvulo njalo kuthe kufika oLwesithathu kungasela ngitsho lethonsi lalawo mafutha emagalajini okudale ukuthi aqalise ukuthengiswa endaweni ezingekho emthethweni.
Isigubhu esithwala amalitha amahlanu sibiza amadola alitshumi lambili $12.00 kulabo abathengisa lamafutha emkambo wensitha.
Lokhu kudale ukuthi abatshayeli bama taxi labo bakhweze imbhadalo yokugada izimota zabo ngesilinganiso samatshumi amahlanu ekhulwini 50% kusukela ku50cents umuntu ngamunye kusiya ku 75cents.
UMnu. Amos Siziba ngomunye walabo abalele egalajini leZuva ngoLwesithathu belinde lawamafutha njalo uthi lokhu sekuphazamisa ibhizimusi labo.
UMnu. Thamsanqa Ndebele uthi uhulumende kumele athele lawamafutha emagalajini ngobunengi ukuze labo abawathengisa ngentengo ephezulu nsitha behluleke ukukwenza lokhu.
Ayisibo bezimota kuphela abakhala ngodubo lokusilela kwamafutha lokhu, uMnu Kekeletso Silaigwana uyemba igolide njalo uthi umile ukusebenza ngenxa yokuthi imitshina ayisebenzisayo ifuna amafutha.
UMnu. Mduduzi Tshuma owebandla elephikisayo eleMDC-T elikhokhelwa nguMnu Nelson Chamisa ngomunye walabo abakade belinde ukuthela amafutha njalo uthi loludubo luveza sobala ukwehluleka kukahulumende.
Umphathintambo obona ngezenzakala eZansi yemaNdebeleni uMnu. Abedinico Ncube kathandanga ukukhuluma okunengi ngaloludaba esithi luzalungisiswa kunsukwana ezilandelayo.
Your browser doesn’t support HTML5
UAlbert Ncube Uyalandisa