Inengi labasakhulayo bayayisola indlela imithethwandaba yeZimbabwe esebenza ngayo, besithi ilobandlululo, ikakhulu emacaleni aphathelane lezombusazwe. Abasakhulayo laba bathi lokhu kuyabethusa ngoba kudala ukuba bephume kwezombusazwe.
Ukukhonona kwabatsha laba kulandela ukwehluleka kwamanye amalunga ebandla leCitizens Coalition for Change, ukuncintisa kukhetho lwama by-elections oluqhutshwe ngoMgqibelo odluleyo ngemva kwesinqumo somthethwandaba esibavimbe ukuba bengene kukhetho lolu.
Osakhulayo okubandla leCCC, uSenzeni Maphosa, uthi izinqumo zemithethwandaba sezibangela ukuthi intsha yakuleli ibaleke elizweni.
“Indlela amacala ezombangwazwe aphathwa ngayo zinkantolo zakuleli zephula umoya, ikakhulu eyethu abasakhulayo ngoba akusela themba lokuthi loba ungaba lendaba yakho, ungayakhona uyenqoba. Lokhu sokwenze ukuthi abatsha baswele ithemba lenhliziyo ende kwezombangazwe eZimbabwe. Sokwenza abanengi befune ukuchapha imingcele beye kwamanye amazwe ukuyadinga amadlelo angcono. Abasathembi ukuthi inkantolo zethu zisasinika isigwebo esimhlophe.”
Uphinde wathi abatsha abancintise kukhetho olusanda kwenziwa bangene kulukhetho bebhekane lenkinga ezinengi.
“Singakhangela indaba yezimali njengomzekeliso, abanengi babo bancedwa ukukhankasela ngoNcwabakazi. Ukuthi bebuyele njalo beyecela uncedo kumaBy-elections, kusuka kube nzima. Khona kuvele kunzima njalo kubuhlungu ukukhankasela ukhetho umuntu owake wanqoba khona. Yikho sisithi kubalulekile ukuthi izigwebo zenkantolo zikhangele konke lokhu.”
Kodwa Isikhulumeli sabatsha bebandla leZanu PF koBulawayo, uMnu. Addington Mpofu, uthi kumele abasakhulayo bekhohlwe ngezokhetho bebhekane lokudinga amathuba okuziphilisa.
“Sokumele abasakhulayo bephume kuElection mode, beqalise ukudinga imizamo engabaphilisa. Yikuthi besebejwayele ukuphiwa ama $2 ngabakhokheli babo khona ngale kuOpposition, sebebona ngani impilo injalo. Kodwa amathuba manengi asasekhona, asevulwe nguhulumende, okumele ontanga behlolisise, bekhangele ukuthi bafuna ukungena kuwaphi akhona. Abatshiyane lokuchothoza kuphela, ikakhulu laba abaphikisayo.”
Isikhulumeli sabasakhulayo abakubandla leMDC, uLethubuhle Ndlovu, uthi okunye okwenza bengasathakazeleli ezombusazwe yikuthi kabaphathwa kahle kumabandla abo.
“Okwenzakalayo lokhu kufuqela ontanga ekuthatheni izidakamizwa lokungenana lobugebenga. Bayazama sibili ukulungisa ilizwe abasakhulayo, kodwa abawaphiwi amathuba. Kungenani lokuthi bathenjiswa okunengi, okulanto ebambekayo abayenzelwayo. Bacina bethi, kungcono sitshiyane lakho okombusazwe lokhu.”
UTsitsi Mashavave, osakhulayo ohlala eHarare, ukhala ngokungaqondakali kwesimo sezombusazwe eZimbabwe.
“Ezepolitiki zakuleli azisathembeki ngoba lokuthi ziyangaphi, akukhanyi. Njengathi abasakhulayo, sesizidingela ukuphila nje, ngoba asilalelwa, loba singakhuluma kanganani, kumbe singavota. Njengalokhu okwenzakala emthethwandaba, kuveza sobala ukuthi okufunwa ngabalutshwana yikho okweziwayo, hatshi intando kazulu.”
Umqondisi wenhlanganiso ebona ngezokhetho, eyeElection Resource Centre, uNkosikazi Barbara Bhebhe, uthi inkantolo kumele zikhiphe izinqumo zazo isikhathi sisasekhona, hatshi sokusele imizuzu emilutshwane ukuze izinto ezinjengokhetho, zenziwe.
“Kubalulekile okutshiwo ngabontanga nxa bekhala ngenkantolo ngoba ngesinye isikhathi izinqumo eziphuma khona, zibuya isikhathi sesiphelile, okudala ukungathembeki kuzulu. Nxa amaCourts esenza umsebenzi, kuqakathekile ukuthi azame ukwenza lokhu ngesikhathi esifaneleyo, hatshi lokhu esikubone kukhetho lwamaBy-elections, lapho abanye ababencintisa, bakhitshwa ephepheni lokuvota, sokusele amahola nje ukuthi kuyiwe kukhetho. Nxa kungenziwa ngesikhathi, kunika iZEC isikhathi sokutshela abantu ngalokhu konke okuyabe sokutshintshile, ukwenzela ukuthi abantu bethathe amanyethelo abawafunayo, belolwazi.”
Ngemva kokhetho lukaNcwabakazi, amalunga aweCCC asephanyeke izicelo ezimbalwa emithethwandaba, ngenhlupho ezidalwe ngozithi ungunobhala walelibandla uMnumzana Sengezo Tshabangu, ezokuxotshisa amalunga ebandla edale lephalamende lakumakhansili.
Ezinye ingcwethi ezicubungula indaba zabatsha zithi ngenxa yalokhu okwenzakale lonyaka emthethwandaba, kungabangela ukuthi abasakhulayo abanengi bengabi lesifiso sokungena kwezombusazwe.
Imizamo yeStudio 7 yokuzwa imibono kahulumende phezu kwezikhalazo zabasakhulayo laba yehlule ngoba umphathintambo wogatsha lwezemithetho, uMnu. Ziyambi Ziyambi, kanye lonobhala wekomishini eyeJudicial Service Commission, uMnu. Walter Chikwanha, bebengaphenduli omakhalekhukhwini.