Ngesikhathi eleZimbabwe lilabadlali abayisikhombisa kuphela emidlalweni yama Olympic Games kwele France, abatsha bathi lokhu kuveza ukungaqhutshwa kahle kwezemidlalo elizweni. Kulez’insuku iqembu lelizwe elenguqu eleWarriors lidlala imidlalo yalo kwele South Africa ngenxa yokuswelakala kwenkundla zemidlalo eZimbabwe.
Abatsha bathi ukuswekala kwenkundla zakulez’insuku zokudlalela imidlalo eyehlukeneyo kwenza ukuba kube nzima ukuba abadabuka eZimbabwe bencintisane labanye abadlali. Imidlalo efana lenguqu ayila nkundla zakulez’insuku ezivunyelwa ukusetshenziswa emhlabeni jikelele, kuthi inkundla zemidlalo efana lokugijima, itennis, basketball, cricket, basketball, volleyball lokunye zisesimeni esibi kakhulu.
Abatshi bathi lokhu kuphazamisa imizamo yabo yokuthola imali ephiwa amanye amazwe eyokuzilibazisa lokwakhe kanye lokuvuselela inkundla zemidlalo. Omunye owake wadlala umdlalo wekilikiti, uDumisani Mankunzini, uthi kuphazamisa ukuswelakala kwenkundla zemidlalo zaphezulu.
CS Davies Swimming Pool in Highfield, Harare
“EZimbabwe kakudlalwa kuma ground amahle, kwenza kube nzima ukuba udlale kunkundla ezilungisiwe, kuyaphazamisa kwenza ukuba kube sengathi abantu kabenelisi ukuncintisa. Kuqakathekile ukuthi silungisele abadlali bethu’’
Basketball pitch in Harare
Lokhu kusekelwe nguJerry Zingwevu, owake wadlalela iqembu leZimbabwe Saints ngo2002.
“Imidlalo efana lokubhukutsha kayilungiselwa. Zilitshwana indawo ezifundisa abantwana ukubhukutsha. Umuntu ucina esisiya fundela kwamanye amazwe.”
Osakhululayo uDilicious Mathathu uvumelana loZingwevu.
“Nxa sikhangela abadlali bethu abasuka kwele Zimbabwe besiya kumidlalo efana lama Olmpics uyabona ukuba baphazamiswa zinkundla zethu, umdlali osuka eZimbabwe esiya kwamanye amazwe usuka ethuke nxa ethola okutsha akuthola kwamanye amazwe.”
Oloba imidlalo yenguqu uBuhlebenkosi Sibindi uthi kumele uhulumende aphange alungise indawo zokudlalela imidlalo esithi isithembiso sikamphathintambo kahulumende obona ngezemidlalo uNkosikazi Kirsrty Coventry esokulungiswa kwenkundla zemidlalo kumele sifezeke.
“Nxa siqathanisa abadlalo bethu lapho abalungiselela khona lalapho okulungiselwa khona uyabona ukuthi kwehlukene. Kumele uNkosikazi Coventry alungise lokho akuthembisayo ngoba abatsha bathwele nzima.”
Kodwa umsekeli womphathintambo wezemidlalo uNkosikazi Emily Jesaya uthi uhulumende uyakwazi okudingwa ngabatsha kwezemidlalo.
"Uhulumende uyalungisa inkundla zethu. Nxa sezilungile uzulu uzakwaziswa. Sathembisa ukwenza lokhu njalo sizakwenza. Sidinga imali yokwenza lokhu kodwa kukhanya konke kuzalunga’.’
UNkosikazi Coventry wathembisa ukuba inkundla zemidlalo ezigoqela eyeNational Sports Stadium ziyabe sezivuselelwe kufika uNhlangula lonyaka kodwa akulalutho osolwenziwa kuze kube lanamhlanje ngoba iqembu lenguqu eleWarriors lokhe lidlala imidlalo yalo kwamanye amazwe.
Lokhu kuzakwenzakala kuqembu leNgezi Platinum Stars lele Dynamos azamela eleZimbabwe kumncintiswano weConfederations of African Football. Amaqembu la akhangelelwe ukuba azadlala imidlalo yawo eZambia lakwele South Africa.
SEE ALSO:
Udaba Esilwethulelwe NguMlondolozi Ndlovu