Abatsha abenelisa ukuthola usekelo lwemali yokusungula imisebenzi yokuzenzela emzini we Epworth duzane leHarare, bathi sebephila impilo encono kulaleyo abebeyiphila bengakatholi uncedo lwemali le.
Abatsha laba bathola usekelo lwemali kunhlanganiso yabatsha ezimeleyo eye Youth Agenda Trust nyakenye lokusungula imisebenzi efana lokunusela insimbi lokulungisa amakhandlela:
UBatanai Masunda ngosakhulayo oquba umsebenzi wokugamula lokuthengisa inkuni kulumuzi njalo uthi lokhu sokuthuthukise lempilo yakhe kusukela athola usekelo lwemali ngoMpalakazi nyakenye. Uthi senelise lokuqatsha abanye abatsha abathathu ukuba bephathisane laye kulumsebenzi okuyinto ephendlela abanye umsebenzi.
Omunye njalo osakhulayo uBrighton Makani uquba umsebenzi wokufuya inkukhu:
Sifice uBrighton olenkukhu ezedlula ikhulu esuka emzini wakhe elubhekise edolobheni esiyathenga amanye njalo amatshiyane alikhulu okwengezelela kunani lenkukhu alazo ngoba esithi ziyathengwa kakuhle njengamakhukhisi. Uthi isifiso sakhe yikuba zifike kwezingamakhulu amahlanu kwelakusasa. Unina kaBrighton, uNkosikazi Makani yena uthi lolusekelo luqakathekile kakhulu ngoba soluphathise abasakhulayo okwamagama inengi labo elingayitholi imisebenzi yokuthi baqhatshwe.
UNkosikazi Makani uthi ufisa ukubona lolusekelo qhelislwa ukuze lufinyelelwe ngabasakhulayo abanengi ilizwe lonke ngoba abatsha bethwele nzima ngalezi nsuku ukuthi bathole imisebenzi.
Isikhulumeli senhlanganiso eyiyo esungule inhlelo zokuphathisa abatsha laba eyeYouth Agenda Trust umnumzana Francis Rwodzi uthi lokhu kutshengisa ukuba abasakhulayo balakho ukuthuthuka banganikezwa usekelo lwemali kunye lolwazi lokuquba imisebenzi yabo:
Abanye abatsha esidibane labo emzini weEpworth, bagoqela amantombazana athi uAlice, uTariro lo Moila abaquba umsebenzi wokupheka lokulungisa amakhandlela. Kuzoba lo Rutendo opheka isinkwa, amabhanzi lama khekhe kulumuzi njalo osefuna ukuqhelisa umsebenzi wakhe ukuze athengisele hatshi emzini we-Epworth kuphela kodwa lakwezinye indawo eziseduzane.
Umuzi we Epworth ngumuzi ohlala abantu abaswelayo abaphila nzima okwamagama ngoba bengela manzi aphuma empompini, njalo bengelawo amandla ka getsi lemigwaqo ezwayo.