Okulungiswa ngomunye wabaphutshe izifundo
Banegi abasakhulayo abathakazelela imizamo kahulumende lenhlanganiso ezisebenza zizimele, eyokuthi bethole ulwazi lwemisebenzi yezandla- yona abathi ibaphathisa kakhulu empilweni zabo.
Njengoba imisebenzi isilela elizweni, abasakhulayo laba bathi balakho ukusungula amabhizimusi abo uma belobungcitshi bokwenza lokhu.
Vocational training
Kulezifundi ezingamakhulu amathathu lamatshumi ayisitshiyagalolunye ezikolweni zeHarare ezibalisa i-St Peter’s Kubatana lePeople’s College, ezaphiwa izicoco zokuphutshisa imfundiso yemisebenzi yezandla efana lokuthunga, ukubaza, ukweluka, ukupheka, leminye eminengi-nengi, phansi kohlelo lweUplift/Phakamisa/Simudza.
Uhlelo lolu lwalukhokhelwa yinhlanganiso yeGOAL Zimbabwe, isebenza lezinye inhlanganiso ezibalisa iMusasa, Childline, YETT lePadare. Imali yohlelo lolu bayinikwa nguhulumende weMelika phansi kogatsha lweUSAID.
Vocational training
Omunye osakhulayo owayefundela ukubaza, uNorbert Milanzi, uthi ubonga uhlelo lweUplift ngoba laye selolwazi lokuzidingela imali yokuziphilisa.
“Mina ngangivele ngithanda ukubaza yikho ngangena kuhlelo lolu. Kwanginceda ekuthini kwangipha ulwazi lokuthi nxa ngingalungisa lokhu engikulungisayo, zindlela ziphi engingazithengisa ngazo ukuze ngithole inzuzo. Ngafunda ukuthi ukuba lesipho kuphela akweneli ngoba kunengi okufunakalayo ukuze ibhizimusi lokubeza liphumelele.”
Omunye njalo owayefunda ezokuthunga uFlorence Gumbo, uthi uhambo lwakhe lwalungekho lula, kodwa uyajabula ukuthi uphutshe kuhle izifundo zakhe.
Vocational training
“Kunengi okuhluphayo nxa uvela emulini eswelayo, okubalisa ukuswela izimali zamabhasi, ukudla okwenelayo, lokunye. Kodwa ngafinyelela ukuze ngibe lapha. Nxa ngikhangela elajusasa, ngizibona lami ngiqala eyami inkampani yokulungisa inwele lokucoca omama. Ngifisa ukuthola uncedo ukuze ngiqale lami okwami.”
Unobhala wohlangothi lwemfundo yaphezulu, uSikhwicamfundo Fanuel Tagwira, owayengumhlonitshwa omkhulu emkhosini lo, wazisa izifundi labazali ukuthi uhulumende uzaqhubekela phambili ngenhlelo zokuthi abasakhulayo bethole amathuba okulolonga amathalenta abo.
Vocational training program
“Sokuyinto yakudala ukuthi nxa umntwana engafeyila uForm 4, kasaqhubekeli phambili lokufunda. Banengi abasakhulayo abalezipho ezingafuni amabhuku amanengi. Thina njengohulumende sithi kasibaphathiseni ukuze izipho lezi zibatholise impilo enhle. Ngumlandu womuntu wonke nje, ukuthi amathalenta abantwabethu athelezelwe ukuze abanike inzuzo, kanye lokuthuthukisa izigaba zethu.”
Umsekeli kamqondisi obona ngokuqhutshwa kwenhlelo kunhlaganiso yeUSAID, uNkosikazi Olivia Knight, laye owayesemkhosini lo, wathakazelela ukusebenza ndawonye lohulumende ukuze impilo zabasakhulayo ziphakanyiswe.
Olivia Knight
“Okuhle phezu kohlelo lolu yikuthi kalubandlululanga phakathi kwalabo abakhwabitha amabhuku, lalabo abasalela emuva, kodwa lwabalinganisa. Mina ngibona izifundi lezi zithuthukisa izigaba zazo, ngoba konke abakufundileyo kuyafunakala emphakathini. Ngibafisela inhlanhla bonke abaphutshe izifundo zabo namuhla.
Osakhulayo ocubungula indaba zabatsha njalo esebenza lenhlanganiso yeTeam Europe Youth Sounding Board, uTamia Govera, uthi kuqakathekile ukuthi uhulumende aqhubeke ngokuncedisa izikolo ezifundisa imisebenzi yezandla.
Vocational training program funded by USAID
“Izikolo lezi ziqakathekile ngoba zilakho ukwehlisa inani lamajaha lezintombi abangangenana lokuthatha izidhakamizwa kumbe ukuba yizigilamkhuba. Kubatholisa imisebenzi yokuzisebenza. Kodwa uhulumende kumele laye abuye lemali yokuthuthukisa lezi zikolo ngoba zisasilele emuva.”
Uhlelo lokunceda abasakhulayo olweUplift/Simudza/Phakamisa, lwalujonge ukuphathisa abasakhulayo abahlala endaweni ezibalisa iHopley, Stoneridge laseMbare- esigodlweni, eHarare.
Inhlanganiso yeGOAL Zimbabwe, eyayikhokhela loluhlelo, yathembisa ukuqhubeka isebenza lomphakathi ukuze abasakhulayo bethole ubungcitshi obungabanceda kwelakusasa.
SEE ALSO:
Udaba Esilwethulelwe NguTobias Mudzingwa