lngatsha zikahulumende ezingamatshumi amabili lane namuhla bezibhalisa abadinga imIsebenzi kuhlelo obeluqhutshwa yikhomishini ebona ngokuqhatshwa kwezisebenzi zikahulumende eyeZimbabwe Public Service Commission (PSC) koBulawayo eZimbabwe lnternational Trade Fair.
Uhlelo lolu luzaqhubeka ngoLwesine. Bekubhaliswa abaleminyaka engamatshumi amane kusiyaphansi ukuthi bethole imisebenzi etshiyeneyo kungatsha zikahulumende, njalo abanye bathi abakaze basebenze selokhe baqeda izifundo zabo emakolitshini.
Osakhulayo uMemory Ndlovu uthi waphutsha izifundo zakhe ngomnyaka ka2018 eNational University of Science and Technology kodwa ulokhe engakatholi umsebenzi.
"Ngiyenelisile ukubhalisela ukufolelanumsebenzi ePSC, kodwa lokhe ngaqeda izifundo zami angikenelisi ukuqhatshwa imisebenzi inzima ukutholakala."
Omunye osakhulayo laye owenelise ukubhalisela ukufolela umsebenzi uNkosazana Precidious Gwate owafunda eLupane State University uthi udinga amathuba okusebenzela uhulumende.
"Ngiqede izifundo zami ngo2020 eLupane State University kodwa lokhe ngingakatholi umsebenzi, ngikhangelele ukuthi ngithole kuhulumende uma kungavuleka amathuba emsebenzi. Impilo inzima.."
Isakhamuzi sakoBulawayo, uMnu Ben Moyo, uthi bakhathazekile ngeminyaka ehlelwe nguhulumende yababhalisela ukufolela umsebenzi.
"Siyakhathezeka ukuthi uhulumende ubhalisa abantwana abaleminyaka eyi40 kusehla, labake asebehlale iminyaka befundele umsebenzi isithupha singakaze sidindwe babengaphi. Ungananzelela uhulumende uthi umuntu uma umsebenzi eleminyaka engu65, pho laba asebevalela phandle kuhlelo lokubhalisela ukufolela umsebenzi kuhulumende bayekubani."
UPublic Service Commissioner uSikhwicamfundo Carrol Themba Khombe uthi inani labantwana abakuluhlu lwabantu abafolele umsebenzi liphansi eMatabeleland.
"Sinanzelele ukuthi inani lababhalisele ukufolela umsebenzi luphansi kakhulu yikho sesiphume ijumo ukuthi sifinyelele kuzozonke izigaba zelizwe ukuze bonke abafundele umsebenzi bathole amathuba alingana labakwezinye izigaba zelizwe."
Wengeze wathi bazaqhuba uhlelo lolu kuzigaba zonke zelizwe.
"Siphakathi kokubhoda ilizwe sibhalisela ukufolela umsebenzi kuhulumende. Abazakwehluleka ukubhalisa lamuhla lakusasa, sizathumela kumaphephandaba ilink abazayilandela ukubhalisela ukufolela umsebenzi ebulenjini njalo zonke izigaba zilamawofisi ePSC abadinga umsebenzi kuhulumende bengayabhalisa."
Ingcwethi ezicubungula ezemfundo zithi ukubhalisa kwenani eliphansi labafundi eMatabeleland kungadala ubuyanga elizweni lenani eliphansi labantwana beMaNdebeleni abasebenza kuhulumende ngoba kuvele kulohlupho lokuthi abaphumeleli kuhle ezifundweni zabo ngezizatho ezithile. Abenelisi njalo ukufinyelela amakolitshi ngoba bengelazifundo zescience.
Abe PSC bathi leli lithuba elihle abalipha abafundi abafundele imisebenzi ukuthi babhalisele ukufolela umsebenzi kuhulumende. Bathi abantu bengafika eJob Fair bayafinyelela kungatsha zikahulumende ezehlukeneyo bayebhalisela ukungena umsebenzi.
IPSC ithi umbukiso loluhlu lwamabizo lemisebenzi abalayo ngowesibili, owakuqala bawenzela eHarare njalo bazabhoda ilizwe lonke.
SEE ALSO:
Udaba Esilwethulelwe nguAnnahstacia Ndlovu