Abatsha abangamakhulu ayisikhombisa abavela emazweni atshiyeneyo abadabuka kuzwekazi le-Africa bakwele Melika phansi kohlelo lweMandela Washington Fellowship oluqhutshwa minyaka yonke.
Phansi kwaloluhlelo abatsha bafundiswa okutshiyeneyo okubaphathisa ukuthuthukisa imisebenzi yabo nxa sebebuyela emazweni abo.
Lonyaka kulabatsha abavela eZimbabwe abangamatshumi amane abaphatheka kuloluhlelo. UDokotela Delton Dube osebenza esibhedlela seUnited Bulawayo Hospitals ophatheka kuloluhlelo esekolitshini leUniversity of Delaware uthi ufunda okuphathelane lezobukhokheli.
“Sizafunda ngokuthi izizalwane zeMelika zakha njani ilizwe elikhulu kangaka. Sizahlangana labanye abakhokheli lapha eDelaware esizabelana labo ulwazi.”
Olwela amalungelo oluntu ePlumtree, eMatabeleland South, njalo efunda e-University of Maryland phansi kohlelo lweMandela Washington Fellowship, uNtando Sibanda, uthi ukhangelele ukubumba ubudlelwano obuhle labanye abavela kwamanye amazwe.
“Ngikhangelele ukuthi ubudlelwano engizabumba labanye abavela emazweni ehlukeneyo awe Africa buzangiphathisa emsebenzini wami sengibuyelile ekhaya uhlelo lolu seluphelilse.”
Owaphatheka kuloluhlelo nyakenye, uNkosikazi Phindile Gosha, uthi uhlelo lolu lwamphathisa kakhulu.
“Engabuyela lakho ekhaya, kwangincedisa kakhulu yibudlelwano labanye abatsha, ubudlelwano lobu bangivulela amathuba amanengi kakhulu.
UDokotela Dube ukhuthaza abanye abatsha ukuthi labo bengazikhangeleli phansi njalo basebenze nzima ukuze bethole amathuba afana lala.
Uhlelo lweMandela Washington Fellowship for Young African Leaders lwasungulwa ngowayengumongameli weMelika uMnu. Barak Obama ngomnyaka ka 2014 ngenhloso yokwabela ulwazi abatsha abadabuka kuzwekazi le-Africa.
Kuminyaka elitshumi edluleyo uhlelo lolu seluphathise abatsha abazinkulungwane eziyisithupha lengxenye, 6,500 abadabuka emazweni angamatshumi amane lasitshiyagalolunye.
Ngemva kokuzofunda eMelika okwamaviki ayisithupha, abatsha bayathola njalo amathuba okusebenzela ndawonye leziphathamandla labosomabhizimusi beMelika phakathi kokunye.
SEE ALSO: Udaba Esilwethulelwa nguTaboka Ncube