Abasakhulayo abadabuka eZimbabwe akade beyingxenye yabahlola ukhetho olusanda kuqhutshwa kwele South Africa bancoma indlela oluqhutshwe ngayo yikhomishini ebona ngezokhetho eye-Electoral Commission of South Africa.
Bathi kunengi okungafundwa ngamabandla ezombusazwe njalo lekhomishini ephethe ezokhetho eyeZimbabwe Electoral Commission, ehlala isolwa ngabamabandla aphikisayo athi iyehluleka ukuqhuba ukhetho olukhululekileyo.
Abadabuka eZimbabwe abahlole lolukhetho bathi abatsha bebekhokhela amabandla amanengi agoqela elibusayo ele-ANC, Build One South Africa lele Economic Freedom Fighters ngesikhathi kulungiselelwa ukhetho lolu langosuku lokuvota. Omunye wabahlole ukhetho lolu nguGift Ostallos Siziba, okumbuthano weBlue Movement osekela owayekhokhela ibandla leCitizens Coalition for Change, uMnu. Nelson Chamisa.
“’Thina besikhona eSouth Afrca. Sifunde ukuba sikhuthaze abatsha njalo kuqakathekile ukuba baphatheke kukhetho lokuhlonitshwa kwamabandla ezombusazwe.’’
Osakhulayo owenhlanganiso yeAfrican Leaders Network, uFreeman Mabhonga laye ubekwele South Africa ehlola ukhetho lolu.
‘’Ngifunde uku kuyenzeka ukuba abatsha nxa bengakhuthazwa njalo bazinekile akula okwehlulayo. Sibone abatsha abanengi bephatheka hatshi njengabasekeli kodwa lanjengenkokheli okutsho ukuba leZimbabwe nxa sifuna inguquko kumele abatsha baphatheke.’’
Ilunga lenhlanganiso yabomama eyeYoung Women for Empowerment u-Gracious Mlotshwa uthi okukhulu akufundileyo yikuba amabandla ezombusazwe akwele South Africa ayakhuthaza ukuphatheka kwabatsha kusetshenziswa imthetho yakulelo lizwe. Uthi kumele kuguqulwe imithetho e-Zimbabwe ukuze abatsha benelise ukukhankasela ukhetho bekhululekile.
“Sibone ukuba indaba ye internal democracy iqakathekile kakhulu ukuba abatsha basukume. Kumele lathi sibe lemthetho ekhuthaza ukuphatheka kwabatsha kuleli, yiso isifundo esikhulu.”
Abatsha abakubandla leZANU PF akade bekwele South Africa bathi okukhuthazayo kulelolizwe yikuba abatsha kabafiseli ilizwe labo okubi njalo kabalithethisa okwenza basebenze ndawonye.
Osakhulayo okudale leCentral Committee u-Munashe Mtutsa ngomunye wabalombono lo.
“Abatsha abe South Africa bathanda ilizwe labo. Yikho okumele sikubone hatshi abatshai abafuna ilizwe libhidlizwe yizijeziso. Nxa abatsha bengalandela lokho hayi iZImbabwe iyaththuka.’’
UGregory Maphosa owebandla leCitizens Coalition for Change uthi okwenza kube lula kwele South Africa ukukhankasela ukhetho lokuvota yikuthi ibandla elibusayo kalethuseli abantu njengalokhu okuvame eZimbabwe.
“ESouth Africa bekungela muntu obe esethusela abatsha. Nxa ukhetho lungenziwa lukhululekile akula okungehlula loba ngubani.’’
UChamisa yena uthi kumele i-Zimbabwe Electoral Commission ifunde indlela zokuqhuba ukhetho olukhululekileyo kukhomishini ebona ngezokhetho kwele South Africa.
“Kulezifundo esingazifunda, ikakhulu ukuba nxa kusekelwa inhlanganiso ezizimelyo kuyaphathisa. Kunzima ukuba abantu basole ukhetho nxa luhambe ngendlela eluhambe ngayo.’’
Kodwa omunye osakhulayo okubandla leZANU PF, uMabutho Moyo, uthi uChamisa kumele afundise abalandeli bakhe ukuncenga uzulu weZimbabwe ekudingeni amavoti njengalokho okwenziwe ngamabandla aphikisayo kwele South Africa.
“Kumele azi ukuba abantu abatsha bakwele South Africa bazikhethele inkokheli yabo. Esikufunayo yikuba afunde ukukhankasa hatshi ukuba asole impumela sikhathi sonke.’’
SEE ALSO:
Udaba Esilwethulelwe NguMlondolozi NdlovuInhlanganiso yezokhetho kwele South Africa eye Independent Electoral Commission ibika ukuba kulabatsha abafika izigidi ezintathu – 3 million abavote kukhetho lonyaka. Kwavota abayizigidi lengxenye – 2.5 million kukhetho lomnyaka ka2019.