Inhlanganiso ezilwela ilungelo labaphila ngokuthengisa, zithi loluhlangothi lulakho ukulethela uhulumende inzuzo nxa luthe lwaphathwa ngendlela efaneleyo, kungakho kuqakathekile ukuba alukhangele ngelihlo elehlukileyo hatshi ukubathatha njengabantu abaludubo sikhathi sonke.
Zikhuthaza uhulumende ukusebenzelana labaphila ngokuthengisa laba lapho kuhlelwa inhlelo eziqondana labo, kuphathise kwezokubonisana phezu kokungenziwa ukulungisisa udubo lwabo hatshi ukuphilisana okomangoye le egundwane.
Ukuxotshana labaphila ngokuthengisa ezitaladeni laba, ibikwa ingayisiyo ndlela engaluqeda loludubo njengoba kungaphathisi ukuluqeda yena umanisipala elokhe engelazo indawo lapho abangathengisela khona.
Umnumzana Mandlenkosi Sibaya ngomunye wabaphila ngokuthengisa laba. Ukhuthaza umanisipala ukuba abalungisele indawo zokuthengisela, nanku lokhe besanda abafuna ukuziphilisa ngokuthengisa njengaye, befuqwa yisimo somnotho esingamanga kuhle, ingekho imisebenzi, bexotshwa mihla yonke abekade besemisebenzini.
Usibaya uthi hulumende kazinike isikhathi sokudingisisa ukuba abakwamanye amazwe baluphatha njani udaba lwabathengisa ezitaladeni laba.
Okusekelwe ngumqondisi enhlanganisweni elwela ilungelo lezakhamizi eye Combined Harare Residents Association (CHRA), uMnumzana Mfundo Mlilo.
Kumele umanisipala lohulumende, asebenzelane labenhlanganiso yabaphila ngokuthengisa ezitaladeni laba lozulu, kubonisanwe okungenziwa ukuluthuthukisa loluhlangothi kuveza uMlilo.
Umkhokheli wenhlanganiso y Chitungwiza Residents Trust, uMnumzana Mavelous Khumalo, uthi uhulumende kanye lomanisipala kumele bazi ukuba akusintando yabo ukuthi baphile ngokuthengisa ezitaladeni.
Kodwa umanisipala uthi lokho akwenzayo yikuzama ukulungisisa isimo ukuze abaphila ngokuthengisa batholiswe indawo lapho bengasebenzela khona bengangcolisi idolobho.
Isikhulumeli sikamanisipala, uMnumzana Michael Chideme uhlezi etshela uzulu ukuba bakubona kufanele ukwengezelela indawo ezikhona, ukuze abaphila ngokuthengisa basuke ezitaladeni zedolobho.
Okuyinto ehlezi ichothozwa ngabaphila ngokuthengisa laba kanye lenhlanganiso ezibamelayo, ukuba akukho okubonakalayo osekuthe kwenziwa ngumanisipala lanxa lolu sekuyilona hlangothi uzulu asephila ngalo njalo lulakho ukungenisa imali yenzuzo kuhulumende nxa luthe lwaphathwa ngendlela njangalokho okwenziwa kwamanye amazwe.