Abathenga lokuthengisa impahla emazweni angomakhelwane afana leBotswana bayakhonona ngenyathelo likahulumende lokuhlawulisa umthelo emphahleni zendlini ezingena eZimbabwe ebe zingahlaulelwa kuqala besithi lokhu sekuphazamisa ibhizimusi labo.
Inengi eliphila ngokuthenga impahla eBotswana lithengisa eZimbabwe lithi lizwa engathi likhahlelwe ekhalweni kulandela isinqumo sika hulumende weZimbabwe wokwesula ukungeniswa kwezinye imphahla elizweni kungela nhlawulo.
Umphathintambo wezemali eZimbabwe, umnunzana Patrick Chinamasa, esethula isimo somnotho saphakathi komnyaka ngoNtulikazi, uthe abafuna ukungenisa impahla esentshenziswa endlini abasayehliselwa inhlawulo emgceleni.
Ngaphambilini kwalombiko, izihambi bezivunyelwa ukungenisa impahla zingahlawuli umthelo uma zilentengo ephansi kwemali ethile. Lokhu kutsho ukuthi abantu kumele bahlawule umthelo weduty, ezintweni zonke abayabe bezithenge phandle kwelizwe.
UMnuzana Japhet Nkomo ukhala ngokwehla kwebhizimusi ngemva kwesinqumo sikaChinamasa. Ethi inyathela likahulumende liyadanisa ngoba lisenza impilo kazulu ibenzima ngamandla.
Ukhale ngokuthi kunzima njalo ukuthengisa imphahla esuka eZimbabwe kweleBotswaba ngoba uhulumende wakhe efake imithetho elukhuni eyokukhipha imphahla phandle kanye lokusebenzisa inzuzo ngemva kokuthengisa limphahla...
UNkomo, yena uthengisa eziphathelane lemithi yokulima eBotswana isuka eZimbabwe, athi sethole amaPula abe sethenga imphahla yokuyathengisa emkhambo weflea market koBulawayo. Uthi uhulumende weZimbabwe usehlulekile ukudala imsebenzi ngakho kumele akhuthaze, hatshi uku ncidezela, abantu abazama ezinye indlela zokufaka ukudla etafuleni...
UNkosazana Roselyn Moyo uthi yena ube phila ngokuthenga imphahla esentshenziswa endlini efana lamafutha okupheka ewathengisa koBulawayo njalo ethola inzunzo enhle. Uthi kodwa ikusasa ibuvilabana ngoba nangu uhulumende ehluthuna isinkwa emlonyeni.
Uqhubeke esithi inengi seligijimisa ukungenisa imphahla ngundlu ngoba kuyiyo indlela yokubalekela ukuhlawula imithelo emahofisini aweZIMRA.
Uhulumende weZimbabwe yena uthi inyathela leli lafakwa kukhangelwe ukuvikela impahla elungiswa njalo ithengiswa eZimbabwe ngoba sokulempahla enengi njalo elentengo ephansi ephuma emazweni angomakhelwane afana leSouth Africa, Botswana kanye leNamibia.
Njalo iZimbabwe yamisa ukungena elizweni lokuthengiswa kwezigqoko esezike zasentshenziswa ezivela kwamanye amazwe.