Abasakhulayo beZanu PF abasekela icele elizibiza ngokuthi yiTeam Lacoste batshengisele ngoLwesithathu eHarare besithi uMongameli Mugabe kumele akhuze umkakhe atshiyane lokuthethisa uMnu Emmerson Mnangagwa.
ITeam Lacoste licele leZanu PF elilwisana lelinye elaziwa ngokuthi yiG40 ebanga isikhundla sikaMugabe.
Abasakhulayo laba bebekhokhelwa ngumsekeli kamabhalane wabatsha kubandla leli uKudzai Chipanga, njalo batshengisele ehofisini yesigaba seHarare, iprovincial office.
Kumalanga edluleyo kulabasakhulayo bakaMnangagwa abenze umhlangano lentathelizindaba bacela uMugabe ukuthi akhuze umkakhe ekele ukuhlambaza uMnangagwa.
NgoLwesine icele leG40, lona elisekela uNkosikazi Mugabe, lizatshengisela eHeadquarters yeZanu PF eHarare lisola uMnangagwa labantu bakhe.
Ngokwakuqala kumbali yeZanu PF ukuthi ibandla leli litshengise ukudabuka phakathi ngalindlela njalo lamalunga ekhanya engasamesabi lakancane uMugabe lomkakhe.
Ingcwethi kwezombusazwe uMnu Nkululeko Sibanda utshele iStudio 7 ukuthi nxa engalubambanga kuhle loludaba, icele likaMnangagwa lilakho ukuthatha intambo zombuso.
Your browser doesn’t support HTML5
Ingxoxo loMnu Nkululeko Sibanda
Kunjalo nje, uMongameli Mugabe uhlangane lequla lamalunga ephalamende yeMelika lapho asole khona eleMelika ngokumethesa izijeziso zenotho.
Iphephandaba leHerald lithi njalo iqula leMelika leli likhulume ngodaba lukaMnu Itai Dzamara, udaba lwamalungelo oluntu kanye lombuso okhululekileyo.
UMugabe yena ubikwa ethembise ukuthi uhulumende wakhe wenza konke okusemandleni akhe ukudinga uDzamara.