Abasakhulayo abanengi bathi ibutho leZimbabwe kalisetshenziswa ukuvikela ilizwe kuphela kodwa lingenela kwezombusazwe lokubethusela, ikakhulu ngesikhathi befuna ukutshengisela lokukhuluma abafukufunayo.Bathi selokhe ilizwe lathola uzibuse kwakumele kube lendlela ezibalulekileyo zokuba ibutho lingangeneli kwezombusazwe.
Bathi lobanje isesekelo sombuso welizwe sikubeka kucace ukuba ababebutho akumelanga bangenele kwezombusazwe, lokhu ayisikho okwenzakalayo eZimbabwe.
Umkhokheli webutho leZimbabwe uLt. General Anselem Sanyatwe usanda kutshela izakhamizi eNyanga ukuba wonke umuntu kumele asekele ibandla leZANU PF. Wagcizelela esithi ibutho lizabamba ngamandla abantu eZimbabwe ukuba bevotele iZANU PF.
Abatsha bathi okwethulwa nguSanyatwe, ukugenqulwa kowayengumongameli uRobert Mugabe ngomnyaka ka2017 lokunye kuveza ukuba ibutho liyingxenye yebandla leZANU PF.
Osakhulayo uZikhethele Dube uthi kunzima ukuba aqhube umsebenzi webandla lakhe eleCitizens Coalition for Change ngoba wesaba ukukhahlanyezwa ngabakuhlangothi lebutho lwabasebenza ensitha lokwenzakala eZimbabwe olwe-Intelligence Unit.
"Amasotsha akumelanga ephatheke kwezombusazwe ngoba kwenza kube nzima ukuba bavikele labo abafuna ukuphatheka kwezombusazwe.’’
Ibutho liyakuphika ukuba lingenela kwezombusazweText: Abakubandla leZanu PF bathi ibutho leZimbabwe likhululekile. Osakhulayo okubandla leli, uTeddy Ncube, uthi bathakazelela okwenziwa libutho eZimbabwe.
“Ilizwe leZImbabwe lilokuthula kakhulu. Kwenziwa yikuba amabutho ethu enza umsebenzi omkhulu kakhulu.”
Kodwa ingcwethi kwezombusazwe ekunhlanganiso yeZimbabwe Democracy Institute, uMnu. Bekezela Gumbo, uthi kunzima ukwehlukanisa ibutho leZimbabwe lebandla leZANU PF.
"Ibutho lethu lasuka kuviyo leZANLA lele ZIPRA lokhu kwenza kube nzima ukuba litshiye ezombusazwe.’’
UMnu. Mbuso Fuzwayo, unobhala jikelele wenhlanganiso elwela ilungelo loluntu eyeIbhetshu Likazulu, uyakusekela lokhu esithi ibutho lephula ilungelo loluntu ngoba labulala abantu abayisithupha kusanda kuqhutshwa ukhetho ngomnyaka ka2018 lokunye.
“Ayisilo ibutho esasilikhalela ngesikhathi ilizwe lithola uzibuse. Sithemba ukuba kuzalungisiswa lokhu kodwa okwakhathesi alihlonophi amalungelo ibutho.
Ikomishini eyahlolisisa ukubulawa kwabantu laba ngomnyaka ka2018 eyeKgalame Motlanthe Commission yakubeka sobala ukuba ibutho labulala abantu mahlayana. Kuthi njalo eyinye ikomishini eyayikhokhelwa ligqwetha uMnu. Simplicious Chihambakwe, eyahlolisisa umbhuqazwe weGukurahundi okwabulawa abantu eMatabeleland leNkabazwe yiFive Brigade abafika inkulungwane ezimbili - 20,000, kukhanya yethulela uhulumende okwesabekayo okwenzakala ezabelweni lezi ezaziphansi kwebandla leZapu.
Inhlolisiso kaChihambakwe labanye bakhe eyenziwa ngama 1980s lokhu ingakavezelwa uzulu.
SEE ALSO:
Udaba Esilwethulelwe NguMlondolozi Ndlovu