Sezidlela evalweni izakhamizi zeGwanda ngenxa yezigebengu ezihlasela ngemibhobho, amabhemba langenduku zifuna imali labomakhalelekhukwini.
Abahlali beGwanda esixoxe labo bathi abasabuquthi ubuthongo ngenxa yezigebengu lezi ezitshontsha zihlome ngezikhali, okuludubo olusabalale ekuqaleni komnyaka njalo oluqhubeka ludlondlobala.
Ezinye izigebengu lezi zibikwa zingotsheketsha abemba igolide ngaphandle komthetho endaweni ezitshiyeneyo kulelidolobho.
“EGwanda sesihlalela evalweni siseba ubugebengu osobukhona phakathi komuzi wethu; ukuthi loba ulule ungezwa ama-foot steps uyabe ungasakwazi ukuthi kwenzakalani,” kutsho umhlali weSpitzkop North uNkosikazi Duduzile Masilela.
Amazwi akhe agcizelelwe nguMnu Molvin Dube oyisikhulumeli senhlanganiso yabahlali eyeGwanda Residents Association.
“Manje osekusethusa kakhulu yikuthi sokukhanya sokulabantu abahlomileyo langemibhobho okokuthi thina njengezakhamizi esingela mibhobho kunzima ukuthi silwisane labantu abanjalo, kodwa sikhulumisene lamapholisa athi azazama ngazozonke indlela ukusincedisa,” kutsho uDube.
Umsekeli kaMeya walelidolobho uMnu Ponalo Maphala, ongukhansila kaWard 6 yena uthe: “Sebebanjwa nsukuzonke omama ebusuku, bayathathelwa amafoni besetshwe, sokulabantu abayi-squad ababonakala behamba ebusuku. Akusahanjwa sekule-curfew kulindawo lapho esihlala khona esitshela abantu ukuthi bengahambi ebusuku siseba khonokho ukuthi ngeke adlule umuntu.”
Wengeze wathi kuyadingeka ukuthi amapholisa abhodabhode njalonje ebusuku ukuze lezizigebengu zibanjwe zijikelwe emajele.
“Abantu bahlukumezekile lapha ewadini abasakwazi ukuthi benzenjani ngoba siyabe si-reporter everyday but vele kukhanya ukuganga kwakhona akusami, ngingazi wona amapholisa nxa engabhoda kube le-patrol ethize.
“Isigaba sihlaselwe ngendlela engayisiyo, abantwana bathwele nzima, akusamelanga bahambe bodwa bayathathelwa,” kutsho uMaphala.
Osaphethe isihlalo sesikhulumeli samapholisa eZansi yemaNdebeleni uMnu Thabani Mkhwananzi utshele lumsakazo ukuthi bayalwisa ngazo zonke indlela ukuthi baqede ubugebengu lobu.
Kuviki edlulileyo amapholisa abike ukuthi adinga izigebengu ezine ezihlasele izakhamizi ezimbili ngezinduku zathatha imali labomakhalelekhukhwini.
Ekupheleni kukaMabasa amasela ayehlome ngemibhobho ahlasela esitolo sakoMutengeni eSpitz antsotsha imali engena kunkulungwane ezingamakhulu amahlanu, R500,000.
Kusenjalo, iphephandaba leHerald lithi umthethwandaba namuhla ufumane izigebengu eziyisitshiyangalunye,9, zilecala lokuthwala imibhobho ngaphandle komthetho.
Izigebengu lezi zibalisa uMusa Taj Abdul, Liberty Mupamhanga, Prince Makodza, Godfrey Mupamhanga, Charles Lundu, Rudolph Kanhanga, Innocent Jairos, Tapiwa Mangoma loCarrington Marasha.
Udubo lwezigebengu ezibamba inkunzi ngemibhobho lezinye izikhali solubhahile kakhulu elizweni ikakhulu endaweni ezifana lakoBulawayo, eGokwe laseGweru lapho amapholisa asefake khona umthetho ovimba abantu ukuthwala izikhali.
Your browser doesn’t support HTML5
Udaba Siluphiwa nguAlbert Ncube