Amanye amalunga edale lephalamende yakwele Botswana asekhuthaza uhulumende ukuba ayekethise eminye yemithetho ukuze abeZimbabwe benelise ukuthola amaphepha okusebenza ikakhulu emapulazini kanye lekwakheni okuyimisebenzi engakhawabithwa yizizalwane zalelo lizwe.
Ommele ibandla elibusayo edale lephalamende kwele Botswana, umnunzana Paulson Majaga nguye okhokhele linkulumo ecela uhulumende weBotswana ukuthi akhangelisise imithetho yokunikeza amaphepha ikakhulu kulabo abeZimbabwe.
Umbono wakhe, othole usekelo kwabanye bakhe, uthi kumgceke ukuthi abeBotswana abakhwabithi imsebenzi yemapulazini kanye leyokwakha kukanti abeZimbabwe bona abakhethi. UMajaga uthi kuqakathekile ukuthi uhulumende wakhe abaphe amaphepha basebenze bekhululekile, njalo okusemthethweni.
Umphathintambo wogatsha olunikeza amaphepha okuhlala kanye lokusebenza kweleBotswana, ubike ukuba uzalukhangela loludaba aphendukise impendulo edale lephalamende.
Okwakhathesi, eleBotswana liyala ukunikeza amaphepha kwabavela phandle lisithi imsebenzi yemapulazini leyokwakha igcinelwe izizalwane zayo. Kodwa inyathela lephalamende lithokozisa umnunzana Somandla Mpofu.
“Ukuze labo abadinga imsebenzi emapulazini kanye lezinye indawo, kubangcono ukuthi baphiwe amaphepha ngoba kuvikela abantu kanye laye uhulumende weBotswana”.
Njalo uthi kunganceda uhulumende weBotswana olahlekelwa yimali enengi ebisela abangalamaphepha eZimbabwe njalo ekhala ngokudalwa kwamacala.
“Uhulumende angaze ababesele emuva akusizi ngoba baya phenduka futhi njalo lemsebenzi yabo iyabe ilokhe ikhona ingathathwanga ngumuntu. Okungcono yikhona lokhu ukuthi balungiselwe amaphepha ukuze bengadali amacala”.
Ekuhlaleni kwedale elifanayo, abeZimbabwe banconywe ngokusebenza ngobunono langokwethembeka noma nje bebhekane lomumo onzima ekhaya.
Umnumzana Somandla Matshazi uthi akumangalisi ukuthi idale leBotswana lincome indlela izizalwane zeZimbabwe ezisebenza ngayo.
“Akumangalisi njalo ukuthi idale lithi sisebenza kuhle ngoba kuyaziwa ukuthi lapho okuhamba khona abeZimbabwe, imsebenzi yabo iyabukeka”.
AbeZimbabwe abanengi batholakala kungahlangothi yemisebenzi etshiyeneyo njalo endaweni ezinengi bayadingakala okudlula izizalwane zeBotswana ngenxa yokwaziwa njengabantu abasebenza njengoBenjamin kugwalo oludumileyo luka Animal Farm.
Your browser doesn’t support HTML5
Udaba lwenkuthazo yokuthi abeZimbabwe baphiwe amaphepha okusebenza emapulazini