Ukumiswa kokusebenza kwemali zakwamanye amazwe okuqale ngeviki edluleyo sekutshiye uzulu ophila lemikhuhlane ethile enjengeyetshukela oHypertension leminye ebhekane lobunzima obubangelwa yikuqonga kwentengo yemithi kanye lokusilela kwayo.
Unkosikazi Sifiso Ncube ongumongikazi uchasisa ngemikhuhlane enza umuntu athathe imithi okwempilo yonke ebizwa ngokuthi ngama Chronic Illnesses.
“Ngizathanda ukuthi sike sixoxisane ngamachronic diseases, le singathi yimikhuhlane esiyelaphayo kodwa ingaze yelapheke ihambe iphele emzimbeni ihlala ikhona ngakho ke kuyabe kudingakala ukuthi umuntu athole amaphilisi athundubeza ubuhlungu kumbe esingathi angamisa ukuthi lokhu okukhona emzimbeni kungazekwaxhwala kulokhe kubulala umzimba kusiyaphambili esingakuthi khona yicontrol ngesikhiwa,” kutsho uNcube.
UNkosikazi Ncube uqhubeke echasisa ngezifo eziletha ubunzima empilweni ethi okwamanje inengi labantu liyehluleka ukufinyelela ukuthenga imithi leyi ngenxa yentengo eqansileyo.
Unkosikazi Thobekile Siziba ogcine isihlobo esilomkhuhlane wemvukuzane uveza ukudana ngokuthi abantu sebesehluleka ukwelatshwa ngenxa yesimo somnotho welizwe.
“Mina ngilosisi wami ole cancer yeliver khathesi kunzima ukuthi elatshwe just because of the economy kunzima us dollar yimali esingelayo, amamedical aids awasasebenzi kahle ngenxa yesimo selizwe loba sifuna ukuthi simhambise outside the country kufunakala ipassport, ipassport ayiphumi masinya so besicela igovernment isincedise isenzele ama emergency passport for abantu abagulayo ngoba khathesi usisi wami usesimeni esinzima,” kutsho uSiziba.
Umnunzana Calvin Ndlovu osebenza evinkilini elithengisa imithi uthi amaphilisi alabo abaphila lemikhuhlane enjengaboBP leminye anathwa nsuku zonke abasenelisi ukuwathenga.
Uzulu uveze ukukhathazeka okukhulu ngokuthi bayaphelelwa yizihlobo ngenxa yokuqonga kwentengo yemithi lamaphilisi njalo iziqondiso zika hulumende zokwalisa ukusetshenziswa kwemali yaphandle kwelizwe lokungaphumi kwengwalo zokuhambisa ukuthi bayezithengela leyo mithi loba ukuya kwelatshwa kuzakwengeza inhlupho abhekane lazo.
Ingcwethi zezempilakahle zithi ngabe ayatholakala lula amaphilisi la lemithi labo bebezancedisa lapho abenelisa khona ukuze basindise impilo zabantu.
Your browser doesn’t support HTML5
Udaba lwemikhuhlane enathwa amaphilisi nsuku zonke siluphiwa nguBathabile Masuku