Abaphikisayo eZimbabwe bathi kukhangelelwe ukuba ibandla leZanu PF lizabamba ngamandla abantu emadolobheni lemaphandleni ukuba belisekele ngesikhathi kunikwa ukudla abalambayo.
Bathi kusobala ukuba kuzakwenzakala lokhu lemadolobheni lapho okubikwa sokulabantu abanengi abalambayo ngenxa yendlala edalwe yisikhudumezi somkhathi ese-El Nino.
Kodwa ibandla leZanu PF liyakuphika lokhu lisithi kuzasetshenziswa abantu abaziwayo emphakathini abanjengamakhansila ekunikeni ukudla abalambayo.
Ukuze sizwe okunengi ngodaba lolu, uGibbs Dube uxoxe loMnu. Joseph Tshuma, omele iPelandaba/Tshabalala edale lephalamende ekubandla leZanu PF, loMnu. Nhlanhla Moses Ncube, unobhala jikelele wenhlanganiso yeFreedom Alliance. UTshuma uthi kuzasetshenziswa izinduna, osobhuku, abalisa labanye abakhokhela uzulu ekunikeni abantu ukudla.
Uthi wake wakwenza ngesikhathi sendlala lapho asebenzisa njalo inkokheli zamabandla okholo lweSikhristu ekunikeni abantu ukudla.
UNcube uthi konke lokhu licebo elihle kodwa kukhanya engani ibandla leZanu PF lizakhetha abantu babo abazanika uzulu ukundla ngapha libabamba ngamandla ukuthi bebengamalunga alo.