Inengi lezizalwane zeZimbabwe esezihlala kweleBhilithane zithi ukubaleka kweleZimbabwe ezakwenzayo zizocela ukuphephela eNgilandi kwaziphakamisa ngoba sezesenelisa ukufunda, njalo bayavunyelwa ukusebenza kukanti abanengi sebeyakhile sebeze belemuli.
UNkosikazi Lilian Moyo ogomunye wabangena ngale indlela eNgilandi uthi ukuba yisiphepheli kwamnceda kakhulu.
“Ngiya mbonga uNkulunkulu ukuthi ngacina ngenelisile ukufika kuleli ilizwe. Ekufikeni kwami njalo kwaba nzima ngoba ngafika ngaba yi siphepheli. Ngahlala isikhathi eside izinto zingaka ngilungeli. Kuthe maseku lungile, uNkulunkulu ngimbonge njalo ngoba zalunga. Khona manje ngizi hlalele ngi labantwana bami abathathu, ngizendele. Ngibonge njalo uku ngcediswa ngama refugee councils. Impilo yami isintshintshile njalo sengathola ozihlobo ezingabo makhelwane ezivela emazweni atshiyeneyo kunye laba khona lapha abelungu.”
Umnunzana Themba Zhou omunye njalo owe Zimbabwe uthi uHulumende weBhilithane umtshayela ihlombe.
“Kumele simbonge kakhulu uhulumende kaTony Blair ngokusamukela thina amaZimbabwe ukuthi sihlale kuleli, mina ngafika lapha ngo2002 ngibalekela uRobert Mugabe. Ngafika lapha ngamkeleka kuhle, ngihleli ngikhonalapha, selokhu ngafikayo angikaze ngibuyele ekhaya ngoba ekhaya izihlobo zonke sezafa. Sengilemuli yami khonapha ngathatha, unkosikazi ngowase Uganda sesilabantwana abangu 4. Sizihlalele khonapha”
Unkosazana Beauty Ncube osehlala edolobheni leLondon uthi ukuba eBhilithane kumphucule kakhulu
“Mina ngafika kweleBhilithinane ngo 2004, ngacela ukuphephela ngaqala bangingcitsha amaphepha kodwa bangigcina endlini ye NASA ngisamelele iAppeal yami. Ngawathola ke amaphepha ngo2007. Ngasengingena iskolo njengomuntu owayengafundanga ngacina sengifundela ukuba ngu Nurse. Kunjenje senginguNurse, sengendela ekhiweni njalo ngilabantwana ababili. Usuku lwama refugees kuqakathekile kimi ngoba impilo yami yatshintsha for the better ngokuba yisiphepheli.”
Lobanje kungasibo bonke abacela ubuphepheli abahlukunyezwayo inengi livame ukukhanda indaba zokuthi bahlukunyezwa ukuzwe baphiwe ingwalo zokuba yiziphepheli. Kodwake kulabanye abathi bangakulandisela ababhekana lakho okwabenza babaleka elizweni lawe uhle ubone ukuthi lolu asilodaba lokuzicandela ukuthi umuntu athole nje ingwalo. UNkosazana Nomsa Dube ngomunye wabehlelwa yibunzima bokuhlukunyezwa waze wadlwengulwa.
“Ngingu Nomsa Dube ekhaya ngibuya eGokwe ngo2002 ngashaywa ngabanjwa iganyavu ngama youth eZanu ngabalekela kwele South Africa komakhelwane, ngifika ngapha komakhelwane u auntie wangithengela I ticket ngahamba ngaya kwele UK, ngathi ngifika e UK bangenzisa I counselling ngoba vele ngangingekho right ngangingeke ngize ngisebenze, ngangingazi ukuthi impilo yami iyakuphi bengizoba nje yinto or bengithola kwelinye ilanga ngizibulele ngoba bengi traumatised okokuthi bengithi ma ngihleli ngibabone ingathi nampa sebesiza sengingcono kakhulu ngiyasebenza kuleli”
Umnunzana Panyika Karimanzira owenhlanganiso yeRight To Remain leRohl ezincedisa iziphepheli kweleNgilandi ubonga usuku lokunanza iziphepheli emhlabeni wonke jikelele.
“Sengisebenze leziphepheli ama refugees a dinga ukuphephela kwele bhilithani okweminyaka edlula amatshumi amabili ngebandla leRight to remain lale Raw Zimbabwe kuleliviki sinanza I refugee week, ngithanda ukuthi ngithi siyajabula ukuthi sanceda abanengi baze bathola amaphepha , yebo ke basesekhona abangakatholi kodwa sebebalutshwana , sizaqhubeka sisebenza labo ke bonalabo I kakhulu izizalwane zase Zimbabwe baze bathole labo ama paper okuhlala e UK.”
Kusobala ukuthi labo abacela ukuphephela kweleBhilithane baphiwa lencwadi zokuhlala kwabasiza kakhulu empilweni, sebangena ezikolweni, abanye bayasebenza njalo bagcine izihlobo labangane ekhaya eZimbabwe. Kodwa kasibo bonke abenelisa ukuthola lezo ncwadi, sikhona isilinganiso sabantu esithe xaxa, abangenelisanga ukuzithola lezo ngwalo abathi bangafunyanwa baphindiselwe ekhaya abanye babo behamba bekhala kabuhlungu ukuthi sebebuyiselwa emlonyeni wesilwane abasibalekelayo.
Your browser doesn’t support HTML5
Udaba lwabaphephela kweleBhilithani siluphiwa nguEzra Tshisa Sibanda