Ugatsha lukahulumende olubona ngohlelo lokwabela uzulu amashares amankampani emazweni luthi umphathintambo wezemali uMnu. Tendai Biti ubisela muva uhlelo lwe Indigenization. Uthi lokhu ukwenza ngokwala ukufaka umthelo wamankampani wokuqoqa imali yokubhadalela amashares azatholwa ngabantu makhaza.
UMnu. Saviour Kasukuwere umphathintambo wogatsha lolu ubikwa ethi usezame wehluleka ukuncenga uMnu. Biti ukuthi afake umthelo lo omumethwe yiziqondiso zomthetho weIndigenization.
UKasukuwere uthi uBiti udonsela muva ngenxa yokuthi ibandla lakhe eleMDC-T kalisekeli uhlelo lolu.
Umnu. Psychology Maziwisa igqwetha elimele uhlangothi lweIndigenization uthi ukwala kuka Biti kuyamangalisa ngoba kalamali yokuthi uzulu athenge amashares kumankampani emazweni.
UBiti usanda kuthi uhlelo lolu lukhanya lwenziwa ngendlela ezanothisa abalandeli bebandla le Zanu PF ikakhulu abalezikhundla.
Amankampani emazweni kumele athengisele uzulu amashares angamatshumi amahlanu lanye ekhulwini.
Umnu. Abednico Bhebhe oqoqa inhlelo zebandla le Movement for Democratic Change elikhokhelwa nguMnu. Morgan Tsvangirai utshele iStudio 7 ukuthi okukhulunywa nguKasukuwere kuyamangalisa ngoba akulamankampani angenelisa ukubhadala umthelo wokudinga imali yokubhadalela amashares.
