UMongameli Emmerson Mnangagwa kanye labenhlanganiso ezilwela amalungelo kazulu sebethumele amazwi enduduzo emulini kaMnu Selo Nare, owayengumgcinisihlalo wekhomishini ebona ngokuxolelana elizweni eyeNational Peace and Reconciliation Commission.
Bathi uNare, yena owake waba ngumahluleli wenkantolo, udlale indima enkulu ekuqhubeni uhlelo lokuletha ukuxolelana elizweni.
UNare ubhubhele kweleSouth Africa ngoMgqibelo. Wakhethwa ukuba ngumgcinisihlalo wekhomishini le ngo2018 nguMnangagwa njalo utshiye isikhundla lesi nyakenye esesiyaphumula.
Ikhomishini yakhe yaphatha indaba ezinengi ezihluphayo elizweni ezigoqela olombhuqazwe weGukurahundi.
Emazwini akhe enduzuzo awethule ngoMvulo uMnangagwa uthe uNare wasebenza ngokuzimisela okukhulu. Abalwela amalungelo oluntu labo bathi ilizwe lilahlekelwe.
Isiphathamandla senhlanganiso yeZimbabwe Christian Alliance uMnu Useni Sibanda utshele iStudio 7 ukuthi uNare kumele aphiwe inhlonipho yeqhawe lesizwe.
Your browser doesn’t support HTML5
Ingxoxo loMnu Useni Sibanda