Abanye abeZimbabwe abahlala kweleBotswana bengela maphepha aqondileyo, bathi bayaphendukiswa endaweni lapho okuhlatshwa khona ijekiseni yeCovid-19. EleBotswana lona lithi wonke umuntu uzahlatshwa ijekiseni kungakhathalekile ukuthi udabuka kuphi kumbe isimo samaphepha.
Ngesikhathi kusungulwa umkhankaso wokuhlaba amajikiseni aweCovid-19, uhulumende weBotswana wathi kasoke akhethe mhlobo ezahlaba wonke umuntu.
Kodwa kulabanye abeZimbabwe abathi bakhitshiwe emzileni yokuhlaba endaweni ezitsheyeneyo zeBotswana ngenxa yokuthi abalamaphepha okuhlala kulelizwe, ama residence permits. Kodwa kulabanye abathi bahlatshiwe kungela hlupho, kudingakala kuphela inombolo zesithupha.
Umnunzana Mkhululi Moyo ohlala eGaborone yena oyenelise ukuthola ijekiseni,uthi kuqakathekile ukuthi uhulumende weBotswana acace ngesimo salabo abangalamaphepha okuhlala elizweni.
“Mina ngibona kulokungazwisiseki. Uhulumende uthi abantu bebhalisele ukuhlatshwa ijekiseni. Uthola ukuthi kudingakala ukuthi ufake inombolo ye residence permit. Nxa ungabhalanga ipermit number awenelisi ukuqhubekela phambili ngokubhalisa. Uhulumende kumele acace khonapho.”
Uthi kwezinye indawo abantu bayenelisa ukuhlatshwa kungabuzwa amaphepha kukanti kwezinye akulasidingo esinjalo.
“Abantu nxa besiyahlaba, abanye bayabuzwa ama permit abanye ababuzwa. Kuliqiniso, yinto esingibonile lami. Mina bengiyehlaba, kodwa akuzange kubuzwe okunengi. Balobe inombolo zesithupha. Ngakho kusuka kuhluphe ukuthi kahle kahle kufanakalani.”
Umphathintambo obona ngezempilakahle udokotela Edwin Dikoloti, noma engacacanga, uthi wonke umuntu uzahlatshwa ijekiseni, engoweBotswana kumbe engowaphandle.
Isikhulumi sogatsha lwezempilakahle kweleBotswana, kade engakaphenduli imbuzo yeStudio 7, edinga ukwazi ukuthi isimo salabo abangalamaphepha sinjani ekutholeni ijekiseni yeCovid-19.
Ngesikhathi abeZimbabwe kweleBotswana besithi akucaci ukuthi kufunakalani ukuze umuntu athole ijekiseni, abanye babo abahlala eSouth Africa, abafana loMtokozisi Dube, bathi abazange bebhekane lenkinga.
“Mina sengayithola ivaccine njalo akuthathanga sikhathi ukuthi ngiyithole. Njalo bakhona engibaziyo abayitholileyo njengami, kodwa uma usebenzisa iphasiphothi iyadingeka, mhlawumbe okuyikho okungavalela abanye abantu.”
Umphathintambo obona ngobudlelwano beZimbabwe lamanye amazwe, udokotela Frederick Shava, ngesikhathi evakatshele kweleBotswana ngoNkwenkwezi, wathi uhulumende weBotswana wathembisa ukuthi bonke abeZimbabwe bazathola ijekiseni.
EleZimbabwe lalo lathembisa ukuthi lizahlaba zonke izizalwane zeBotswana ezihlala eZimbabwe.
Kusenjalo, amatitshala wonke aseBotswana, kugoqela aweZimbabwe, aphakathi kohlelo lokuhlatshwa ijekiseni yeCovid-19 ngaphambi kokuvulwa kwezikolo ngeviki ezayo.
EleBotswana selibone inani labantu ababanjwa lomkhuhlane weCovid-19 lisehla kancane noma nje izimfa ezibangelwa ngumkhuhlane lo, sezidlule inkulungwane ezimbili (2,171).
Abadlula inkulungwane ezilikhulu lamatshumi amahlanu (151,000) sebatholakala beleCovid-19, kusukela ekuqhamukeni komkhuhlane lo, kwele Botswana.
Your browser doesn’t support HTML5
Udaba lohlelo lokuhlatshwa kwabeZimbabwe abaseBotswana ijekiseni yeC19 Vaccine siluphiwa nguMqondisi Dube