UMongameli weleSouth Africa uMnu Cyril Ramaphosa useqinise iziqondiso zokwenqabela umkhuhlane weCoronavirus ngokufaka ilizwe lakhe kuzinga lesithathu lokuvalwa kwalo, iLockdown Level 3, yona eqale ngoLwesithathu.
Kumbiko awethule ngoLwesibili ebusuku, uRamaphosa uthe uthethe lelinyathelo ngoba umkhuhlane lo usumemetheka kakhulu.
Uveze ukuthi inani lababanjwa iCovid-19 ngosuku selisuke kwabedlula izinkulungwane ezintathu, 3,700, laya phezu kwezinkulungwane eziyisikhombisa, 7,500.
Inani labalaliswa esibhedlela ngenxa yalumkhuhlane selikhwele ngokuphindwe kabili, 56 percent, kuthi ababhubhayo ngosuku labo sebedlalela kokuphindwe kabili, 48 percent.
UMongameli Ramaphosa uthi phakathi kwezabelo zaseSouth Africa eziyisitshiyagalolunye, ezine zazo sezingene kuhlandla lesithathu lokuhlaselwa ngamandla yiCovid-19, i-3rd wave ngesingisi.
“Kuzafuze sibathathele amanyathelo abephula imithetho yeCovid,” kutsho uRamaphosa.
Phansi kweLockdown Level 3, abantu abasavunyelwa ukuphuma ezindlini kusukela ngo10 O’clock ntambama kuze kuyetshaya u4 O’clock ekuseni.
Indawo zokudlela lezokunathela utshwala sezivalwa ngo 9 O’clock ntambama.
Imbuthano ephakathi kwesakhiwo ayisavunyelwa ukwedlula abantu abangamatshumi amahlanu, 50, kanti ababuthene phandle kufuze bengedluli ikhulu, 100.
Utshwala bona sebuthengiswa kuphela kusukela ngo10 ekuseni kusiya ngo6 ntambama kusukela ngoMvulo kusiya ngoLweSine kuphela.
Isizalwane seZimbabwe uMnu Mlungisi Tshabalala utshele iStudio 7 ukuthi ukuqiniswa kwemithetho le kuzabadalela uhlupho olukhulu. Kodwa uthe kungcono ngoba ilizwe alivalwanga ngci.
“Imithetho efakiweyo iyajabulisa ngokuthi ayivalelanga abantu ukuthi baye emsebenzini. bonke abantu bayenelisa ukuthi baye emsebenzini. Besicabanga ukuthi kuzovalwa imisebenzI abantu beqale futhi ukulamba. Kuvalwe izinto ezinengi. Esikujabulelayo yikuthi lema-border kusavuliwe,” kutsho uMnu Tshabalala.
Le yinto egcizelelwa ngesinye njalo isizalwane seZimbabwe uMnu Nkululeko Mathe.
“Into engiyithakazelela kakhulu ngeSouth Africa yikuthi iyakwazi uku-manager ama-lockdown ayo,” kutsho uMathe ngokusuthiseka.
Kodwa umxhasi omkhulu wabaculi uMnu Mcasiseli Gwaza uthi imithetho efakiweyo izabasebenzisa nzima.
Uchasise wathi: “Thina esisebenza emicimbini uku-promoter ama-artists lemidlalo ethile sizoba-affected ngoba phela uhulumende ma ethi ufuna abantu abayi50 usu-haye i-theatre… izasilimaza thina abeZimbabwe esizama ukuzizamela la eSouth Africa.”
KweleSouth Africa okwakhathesi sebesedlula izinkulungwane ezingamakhulu amane, 480,000, asebehlatshwe ijekiseni yeJohnson and Johson ehlatshwa kanye kanti njalo sebeyisigidi lengxenye, 1.5 million abahlatshwe eyakuqala eyePfizer yona edinga amajekiseni amabili.
Asebehlaselwe yiCovid-19 sebesedlula isigidi lezinkulungwane ezingamakhulu ayisikhombisa, 1.7 million kuthi asebefile sebebanga kuzinkulungwane ezingamatshumi ayisithupha, 58,000.
Your browser doesn’t support HTML5
Udaba Soluphiwa nguThuso Khumalo