Kulandela umbiko kahulumende wokuthi kulabantwana besikolo abayizigidi ezine lengxenye, 4, 5 million, abalambayo abamele banikwe ukudla ezikolo, ababalisi bathi umumo wendlala usumubi okokuthi abanye abafundi sebeqaleka ngesikhathi sezifundo kuthi abanye abasayi esikolo ngemfanelo.
Lokhu kufakazwe zinhlanganiso zababalisi ezibalisa eyeZimbabwe Teachers Association (ZIMTA) leyeAmalgamated Rural Teachers Union of Zimbabwe (ARTUZ).
Umphathintambo kahulumende obona ngokwethulwa kwemibiko uMnu Janfan Muswere utshele intathelizindaba ukuthi amanani lawa aphume kuphenyo lwesimo sendlala olweZimbabwe Livelihoods Assessment Committee, lona olwethulelwe idale labaphathintambo, ele-cabinet, ngokusemthethweni ngoLwesibili.
Ngaphandle kwabantwana besikolo, inhlanganiso yeUNICEF ithi kulabantwana abafika phose isigidi, 866,000, abalambayo eZimbabwe okumele baphathiswe ngokudla.
Iphephandaba leNewsDay lona libika ukuba umphathintambo obona ngezokulima uMnu Anxious Masuka uthi imali efunakalayo ukuphandela abalambayo abayizigidi phose eziyisitshiyangalombili, 7, 7 million, isikhwelile isuka kuUS$2 billion yaya kuUS$3 billion.
Umkhokheli weZIMTA uMnu Akuneni Maphosa, utshele iStudio 7 ukuthi uhulumende kumele aphuthume ngokudla okuphiwa abantwana besikolo ngoba umumo usumubi.
Your browser doesn’t support HTML5
Ingxoxo loMnu Akuneni Maphosa