Abanye abantu abasebenzisa iStarlink eZimbabwe bathakazelela ukutshipha kwayo kubelabanye njalo abathi kabenelisi ukuthenga ama-modems lokubhadala imali efunakalayo ukuze umuntu enelise ukuyisebenzisa.
Loba kunjalo ezinye ingcwethi kwezobulembu be-internet zithi iStarlink izaletha inguquko emangalisayo ekuxhumaneni kwabantu lokuthuthukisa amabhizimusi atshiyeneyo ku-internet.
Sokulenyanga iStarlink, inkampani kasomabhizimusi weMelika uMnumzana Elon Musk, yaqala ukusetshenziswa ngabantu eZimbabwe. Ukuze umuntu asebenzise okuthengiswa yinkampani le, kumele athenge imodem ebiza amakhulu amabili amadollar eMelika – US$200 kumbe amakhulu amathathu lengxenye amadollar – US$350.
Othenge imodem elentango ephansi ubhadala amatshumi amathathu amadollar – US$30 ngenyanga kuthi lowo othenge edulayo ukhokha amatshumi amahlanu amadollar – US$50. UNkosikazi Patricia Gumbo ohlala koBulawayo uthakazelela iStarlink esithi wayebhadala amatshumi amane amadollar – US$40 ngenyanga ukuze angene ebulenjini be-internet.
Starlink connectivity
“Ngikhangelele ukwehlisa imali engiyisebenzisayo ukungena ebulenjini njengo mdeni njalo ngesikhathi esifitshane siyisebenzisa isenzele lula kakhulu”
Intathelizindaba uMnumzana Lenin Ndebele laye uncoma iStarlink.
“IStarlink intengo yayo ingcono kulabo Telone labo Econet njalo nxa ngiyisebenzisa iyenza kahle kakhulu akulamphambaniso yokuthi ingathula.
Abasebenzisa inkampani ye-Econet bakhokha imali eyedlula amatshumi amane amadollar eMelika – US$45, kumbe US$87, US$167 kusiyaphezulu ngenyanga. Abasebenzisa iTelOne babhadala phose ikhulu lamadollar – US$90 ngenyanga. Ingcwethi kwezemitshina yamacomputers lobulembu be-internet, uMnumzana Robert Ndlovu, uthi kunengi kakhulu okuzaguqulwa yiStarlink.
“Amankampani amanengi lawa aselama services akade bengawa offi. Kuqala ma kade usithi ufuna i5G ibitholakala kubo Harare lako Bulawayo kuphela kodwa khathesi isikhona indawo ezinengi i4G yeTelone isikhona koBulawayo laseMutare also lama speeds awe connectivity locally ase improvile. Econet has introduced a good package kumbe ngeye $30 unlimited.”
Robert Ndlovu
UMnumzana Ndebele uphinde wathi kodwa iStarlink kayisoze ibhidlize amankampani asungulwa kudala eZimbabwe. Lokhu kugcizelelwe nguNdlovu othi iStarlink ikhangelelwe ukuba izagxila emaphandleni.
“IStarlink is a fixed satellite service, kumele uyibophele, akusiyo mobile phone ohamba uyithwele, ayikho ku-same family leEconet in terms of mobility.”
UNdlovu uthi ukudula kwama kits eStarlink yikho okungenza ingathengwa kakhulu. UNKosikazi Busisiwe Mlotshwa laye usola ukudula kwama moderms eStarlink.
“Abantu abanengi bayehluleka ukuthenga idata ye$15 ngenyanga eyefonini so angiboni bebanengi abangakwanisa ukuthenga iStarlink modem eyi$200 besebekhipha ama$30 ngenyanga.”
Kambe iStarlink ebatshazwa kangaka ngabantu abanengi ingathuthukisa amabhizimusi na? Ingcwethi kwezomnotho uMnumzana Stevenson Dhlamini osebenza ekolitshini yemfundo yaphezulu eyeNational University of Science and Technology uthi amabhizimusi asebenzisa ubulembu be-internet akhangelelwe ukuqhela njalo alakho ukuqhatsha izisebenzi ezinengi kulandela ukuvulwa kwenkampani yeStarlink eZimbabwe.
"Ubuhle beStarlink ikakhulu sikhangele ezamabhizimusi elizweni lakithi izakhuphula ukwenizwa kwama bhizimisi ikakhulu lawo athengisa emambuleni esingathi ngama e-commerce, iza ngesqubu esikhulu. Osamabhizimisi labo abaphatheke ekuthengiseni emambuleni balakho ukuqhatsha abanye abantu."
IStarlink ikhethe ukusebenza lenkampani yeTelone layo eyenza okufanayo. Lokhu sokumangalise abantu abanengi eZimbabwe. Ingcwethi kwezemitshina yeInformation Technology, uMnumzana Prosper Jiyane, uthi lobu budlelwane buzasiza iStarlink kakhulu ngokwenza imitshina yabo itholakale lula elizweni.
“Isizatho sokuthi ngabe bekhethe iTelone yikuthi bagcwele ilizwe lonke njalo okungadala ukuthi kube lula ukuthu umuntu lomuntu lapho ayabe ekhona angayithola lula iStarlink ngesikhathi esifitshane."
IStarlink isisabalele emazweni amanengi kuzwekazi leAfrica lasemazweni athuthukileyo lamanye. Umnikazi weStarlink uMusk ngumqondisi wenkampani yeTesla Motors, X, SpaceX, The Boring Company, Neuralink, leqhuba okweArtificial Intelligence ebizwa ngokuthi yi-xAI..
SEE ALSO:
Udaba Esilwethulelwe Ngqwele Dube