Kuhlelo lwethu lwamasiko lokuphila kwabantu nsukuzonke ngoLwesibili siqhubeke ngengxoxo yethu yesinqumo esiyethulwe ngumthethwandaba wedale leConstitutional Court esith akusamelanga bantwana bathathe kumbe bathathwe bengakabi leminyaka elitshumi lasitshiyangalo mbili – 18.
Abesifazane ababili abenda bebancane - uLoveness Mudzuru and Ruvimbo Tsopodzwa, bafaka udaba lolu emthethwandaba bekhonona ngokuthi umntwana akumelanga athathe kumbe athathwe engakafikisi iminyaka leyo.
Uzulu uthakazelele isinqumo lesi kodwa kukhanya engani kuzabanzima ukuthi kulandelwe isinqumo lesi.
UNkosazana Stars Thebe Mathe olwela ilungelo loluntu uthe kumele abantwana abangamankazana baqale bethombe bengakayi emacansini.
“Okuhluphayo yikuthi kulezi insuku kulamantombazana aya emacansini engakathombi labafana abenza okufanayo bengakajwaqi. Kumele kukhangelwe konke lokhu ukwenzela ukuthi isinqumo somthethwandaba silandelwe. Kodwa-ke kunzima ukuthi konke lokhu kwenziwe njengoba abantwana abasakhulaya sebethanda amacansi.
“Ngibakhuthaza ukuthi bake bame ukwenze lokhu ngenxa yokuthi bayazitshaphaza. Landelani isinqumo somthethwandaba lingavumi ukuthi likhangwe ukuya emacansini lingakathombi kumbe lingakajwaqi.”
UMfundisi Useni Sibanda owenhlanganiso ye Zimbabwe Institute for Social Tranformation ugcizelele esithi okuhluphayo yikuthi abantwana abanengi abangamankazana bacina bekhangwa ngabantu abadala ukuthi baye emacansini ngenxa yendlala.