Ugatsha olubona ngokondliwa kuhle kwabantwana kumanyano weUnited Nations olweUNICEF luthi kulabantwana abafika izigidi ezingamakhulu phose amabili, 181 million, abaphansi kweminyaka emihlanu, abaswela ukudla okwaneleyo njalo okwakha umzimba emazweni omhlaba atshiyeneyo agoqela eleZimbabwe.
Kugwalo elwethule ngoLwesine olulesihloko esithi, Child Food Poverty: Nutrition Deprivation in Early Childhood, iUNICEF ithe emhlubulweni wempumalanga lowezansi yezwekazi leAfrica iSomalia yiyo ekhokhelayo ngaloludubo ilandelwa yiEthiopia, yona elandelwa yiLesotho leMalawi.
EleZimbabwe lona lihlezi kuzinga lesihlanu.
EleSomali yilo elikhokhelayo njalo emhlabeni jikelele lilandelwa ngeleGuinea, kuzobuya eleGuinea Besau kanye leleAfghanistan.
I-UNICEF ithi izwekazi leAsia yilo elibhekane lodubo lwabantwana abahlaselwe yindlala kakhulu, bona abedlula izigidi ezingamatshumi ayisithupha, 64 million, kuthi emhlubulweni weSub-Saharan Africa bayizigidi ezingamatshumi phose ayisikhombisa, 59 million.
Ngokunjalo, iUNICEF ikhuthaze ohulumende bamazwe la ukuthi basungule inhlelo zokutholisa abantwana ukudla okwaneleyo njalo okwakha umzimba ukuze kwenqatshelwe imikhuhlane ebangelwa yindlala.
Ngenyanga edluleyo iUNICEF imemezele ukuthi idinga imali engangeUS$84.9 million yokudingela uzulu weZimbabwe ukudla, ndawonye labantwana abafika phose isigidi, 866,000.
EleZimbabwe libhekane lendlala ehlasele abantu abayizididi eziyisitshiygalolunye, 9 million.
Umsakazo weStudio 7 uxoxe loDokotela Elopy Sibanda, yena othi ukuswela ukudla okwanelayo futhi okwakha umzimba kungabangela imikhuhlane etshiyeneyo ebantwaneni.
Your browser doesn’t support HTML5
Udaba lweUNICEF Olumayelana Labantwana Abalambayo