Izizalwane zeZimbabwe sezemukele ngokukhathazeka isixwayiso esethulwe ngumongameli Cyril Ramaphosa ngoLwesine esithi abantu abadonse amasokisi ekwenqabeleni ukumemetheka komkhuhlane we cornona virus nxa bengafuni ukwethulelwa imigoqo enzima yokuphila.
Umongameli Ramaphosa wenze lesi simemezelo egcwele ukukhathazeka kakhulu ebusweni bakhe.
“Uhlupho yikuthi sekulabanye abantu abangaselandaba lokuzivikela kulo umkhuhlane wecoronavirus.”
Ngolwesine inani labahlaselwa yiCoronavirus ngosuku leqe lisuka kunkulungwane eyodwa lengxenye (from 1,500) ekupheleni kuka Lwezi layahlala phezu kwezinkulungwane ezine (4.400).
Kutholakale ukuthi idolobho leNelson Mandela Bay esabelweni seEastern Cape, zilo elihamba phambili ngokumemethekisa leli gciwane. Lelidolobho lihle lethulelwa eminye imithetho elawula ukuhamba kwabantu, ukuthengiswa kotshwala lemibuthano.
Lobanje kwezinye zonke indawo zelizwe kutshiywe imithetho evele ikhona evumela abantu ukuphila lokusebenza bekhululekile, izizalwane zeZimbabwe zithi isimemezelo sikaRamaphosa zibatshiye belokwesaba.
Isizalwane seZimbabwe unkosazana Mercy Mvundla uthi okubathokozisayo yikuthi imingcele itshiywe ilokhu ivuliwe.
“Kujabulisile kancane khonalokhu ukuthi akusavalwanga imingcele ngakho sesizokwazi abanye bethu ukuthi beye ukuyabona izihlobo zabo. Ngingathi phose yonke imideni yethu ithembele kuthina ngapha esiseSouth Africa ngayo yonke nje indlela yokuphila ongayicabanga. Ngakho ukuvala kwezwe futhi kabutsha bekuzatsho ukuthi kutsho ikhisimusi elimnyama elilendlala elingela lutho.”
Kodwake esinye isizalwane seZimbabwe umnumnzana Greatman Mkhwebu uthi kusegcekeni ukuthi isixwayiso sikaRamaphosa sokuthi lumkhuhlane ususiza ngamandla sikhomba ukuthi ingozi isisemnyango.
“Yeah sizobolela khonalapha mhlawumbe until emnyakeni ozayo ngoba kunjenje just cabanga ma kuthiwa iyekhaya kumele ubhadale icertificate seCovid inkalakatha zezimali, kumele ubhadale imali yetransport, abantwana bafuna ikhisimusi, bafuna ukudla, izikolo ziyavulwa next year ngapha siphuma kulockdown enzima imali uyayithathaphi? Kungenzeka uthi usekhaya uMnangagwa laye abeke eyinye imbandela yelockdown ucine ustakhile ekhaya ngale uphelelwe ngumsebenzi ngapha ekhaya kawusebenzi.”
Inengi labaZimbabwe abasebenza endaweni zokudlela lezokwethekela bona bathabile besithi bebecabangela ukuthi lezi indawo zizavalwa.
Kodwake umnumnzana Salim Abdool Karim, umgcinisihlalo wekomiti exwayisa uhulumende ngokulwiswa kwecoronavirus uthi isabelo se Gauteng leWestern Cape zisengozini yokukhuphuka kwenani labahlaselwe yicoronavirus okuzenza zethulele imigoqo eyenqabela ukuphila ngokukhululeka.
Le yinto egcizelelwa ngumgcinisihlalo weZimbabwe Community in South Africa umnumnzana Ngqabutho Mabhena yena oxwayisa abeZimbabwe kweleSouth Africa ukuthi bengabi yingxenye yalabo abamemethekisa lumkhuhlane.
Kasingayekethisi ukuthi sigqoke amamask, singayekethisi ukugeza izandla, singayekethisi ukuthi silandele imigomo efakwayo ngabezempilo ukwenzela ukuthi igcikwane leli lingamemetheki kugcine futhi sesibuyela esigabeni sokuthi kuyavalwa ngoba siyakwazi ukuthi abantu abanengi abalamsebenzi ngendaba yokuthi sangena kuheavy lockdown ngoMarch.
Sekulabantu abedlula izinkulungwane ezingamakhulu ayisitshiyagalombili (over 800,000)_ asebehlaselwe ligciwane lecoronavirus kweleSouth Africa. Abantu abedlula izinkulungwane ezingamatshumi amabili (over 21,000) sebebulewe yileli gciwane.
Your browser doesn’t support HTML5
Udaba lweCovid 19, kweleSouth Africa siluphiwa nguThuso Khumalo