Abadabuka kwele Zimbabwe abahlala elizweni leSouth Africa bathi kuthule namuhla emadolobheni amanengi loba kuke kwaqhamuka udlakela eKempton Park lapho okuhlaselwe izizalwane zakwele Nigeria.
Bathi abantu bokuza lezizalwane zakwele South Africa bathobelene kulandela ukuhlaselwa kwabokuza ngabathi babathathela imisebenzi eminengi njalo bathengisa izidakamizwa.
Kulabantu abambalwa ababikwa sebefile kudlakela lolu. Amapholisa agcwele endaweni ezinengi lapho avimba ukuhlaselwa kwabantu bokuza.
UMnu. Phathisa Moloi, odabuka kwele Zimbabwe, uthi kukhanya engani amapholisa asekela izizalwane zakwele South Africa ezifuna ukuhlasela indawo ezitshiyeneyo ngoLwesine.
Lokhu kusekelwa nguMnu. Mxolisi Ndlovu, ohlala edolobheni leAlexandra, othi amapholisa athole izidumbu ezimbili kulandela ukudlame lolu ngoMvulo langoLwesibili.
Kubikwa ukuthi abantu kwele Nigeria lakwele Zambia baphindisele ngokuhlasela izizalwane zakwele Soth Africa njalo lokubhidliza amabhizimusi ezizalwane zakwele South Africa anjenge Shoprite, Pick N Pay, DSTV leMTN.
Sezivaliwe ezinye izitolo lezi kwele Nigeria.
Eyinye inkokheli yamazwe akuzwekazi leAfrica ithi kayisahambi emhlanganweni omkhulu wokuhlaziya ezomnotho eyeWorld Economic Forum ozakwenzelwa kwele South Africa.
UMongameli Emmerson Mnangagwa usefikile kwele South Africa azangena khona umhlangano lo. Uchothoze okwenzakala elizweni lelo okulabantu abanengi abadabuka kwele Zimbabwe.
“Kasiluthandi udlakela olunje njalo sitshayela ihlombe uhulumende wakwele South Africa ngendlela abambe ngayo udaba lolu. Siyalulandela udaba lolu njalo siyakhulumisana leziphathamandla zakulelolizwe kanye loMongameli Cyril Ramaphosa.”
Abaphikisa uhulumende wakwele South Africa sebelobele ingcwadi uRamaphosa becela ukuthi benze umhlangano laye ngokukhahlanyezwa kwabantu bokuza.
UMnu. Mmusi Maimane, okhokhela ibandla leDemocratic Alliance, uthi kuyethusa okwenzakala kwele South Africa.
URamaphosa uthi akumelanga kuhlaselwe abantu bokuza ngoba lokhu kuzabhidliza umnotho wakwele South Africa.
Abantu bokuza lokhu bethobelene lezizalwane zakwele South Africa kulandela udlakela olutshiye abanye befile labanye njalo belimele.
Bekulemibiko ethi kulezizalwane zakwele South Africa ebezifuna ukuyahlasela eHillbrow emadabukakusa namuhla kodwa kwavimba amapholisa.
Le yindawo lapho okwaqhamuka khona ukulwa kwabantu bokuza lezizalwane zakwele South Africa emigwaqweni. Omunye walabo abavikela abantu bokuza nguNgwenya odabuka kwele Zimbabwe. Uthi udaba loluhlaselwa kwabantu bokuza kalusoze luphele kwele South Africa.
Your browser doesn’t support HTML5
Ingxoxo Esiyenze LoMnu. Ngwenya
Abantu bayakhala ngokwenzakala kwele South Africa. Abase Zimbabwe bathi uhulumende kaMongameli Emmerson Mnangagwa kumele abancede ukwenzela ukuthi bengahlukunyezwa yizizalwane zakwele South Africa,
Your browser doesn’t support HTML5
Udaba Esilethulelwe NguBenedict Nhlapho