Abantu abanengi bayatshinga okumangalisayo ngesinqumo sikahulumende sokuguqula amanye amabizo emigwaqo koBulawayo lezinye indawo eZimbabwe.
Abantu abanengi bazondiswe ngamabizo abathi awaziwa nguzulu ikakhulu eMatabeleland leNkabazwe.
Baphinde bathi kuyamangalisa ukuthi koBulawayo akulamigwaqo elamabizo amaqhawe anjengomuyi uSydney Malunga, uDumiso Dabengwa, Welshman Mabhena, Swazini Ndlovu, Charlie Gray labanye ababekubandla leZapu elalikhokhelwa ngumuyi uJoshua Nkomo.
Bathi amabizo emigwaqo lezakhiwo kumele kuveze imbali yabantu hatshi lokhu okwethulwe nguhulumende. Basola kakhulu ukuthi umgwaqo olodumo uSixth Avenue usubizwa ngokuthi nguEmmerson Dambudzo Mnangagwa Way kuthi njalo leminye ilamabizo angaqedakaliyo.
Ikhansili yakoBulawayo kubikwa ukuthi izahlala phansi ngokutshetsha ihlolisise udaba lolu. UMnu. Nick Mangwana, unobhala wohlangothi lukahulumende olubona ngokwethulwa kwemibiko utshele uzulu ebulenjini bokuxhumana obeTwitter ukuthi uhulumende ukubone kufanele ukuthi aguqule amabizo emigwaqo lezakhiwo ezitshiyeneyo.
Uthi lokhu kuzakwenza ukuthi abantu babekwazi imbali yelizwe kanye lamasiko kazulu. Esinye isiqa somthetho wamadolobho, obizwa ngokuthi yi-Urban Councils Act, sithi amakhansili yiwo okumele aguqule amabizo emigwaqo njalo anike indawo lezindlu inombolo hatshi uhulumende oseke wakwenza lokhu emadolobheni.
Ukuze sihlaziye udaba lolu akesizwe uGibbs Dube weStudio 7 exoxa lengqwetha elilwela ilungelo likazulu, uMnu. Matshobana Ncube, uMnu. Joseph Tshuma okubandla leZanu PF labanye abantu kuhlelo Zimbabwe Today - Asixoxeni.
UNcube uthe akukho emthethweni okwenziwe nguhulumende.
Your browser doesn’t support HTML5
Uzulu Uzonde Okumangalisayo Ngamabizo Amatsha Emigwaqo