Uzulu weZimbabwe kanye lengcitshi ezicubungula ezombusazwe baveza imibono ehlukeneyo ngombuso kaMongameli Emmerson Mnangagwa lokhu wafungiswayo ukuthatha leso sikhundla ngomnyaka ka2018.
Abanye bathi wehlulekile kodwa abanye njalo bethi usecande indlela zokuhlonipha amalungelo oluntu lokuthuthukisa ilizwe.
Limibono ivela ngesikhathi isiyiminyaka emine uMongameli Emmerson Mnangagwa wabekwa kuleso sikhundla ngabebutho lapho behluthunele intambo zombuso, owayengumongameli ngaleso sikhathi, uMnu Robert Mugabe.
Usuku lwanamhlanje ngomnyaka ka2017 yikho lapho uMnangagwa akhethwa ngabebutho ukuthi abephethe intambo zombuso andubana kwenziwe ukhetho. Ukhetho lwahle lwenziwa ngomnyaka olandelayo lapho acina enqoba khona wafungiswa ukungena embusweni okusemthethweni.
Ingcitshi ecubungula ezombusazwe uMnu Tjenesani Ntungakwa uthi yena akawuboni umehluko phakathi kombuso wakhe lokaMugabe.
“Ukungena okwenza uMongameli Mnangagwa, yikungena ko muntu kwakungamela abe khona. Umbuso wakhe awutshiyani kakhulu loka Mugabe. Umnotho wakhona lokhe umubi kodwa yena kalacebo lokuba kwenziwe njani”
Okungumnqondo osekelwe yisikhulume se ZAPU uMnu Mthulisi Hanana.
“UKungenga kuka Mnangagwa akula mehluko lo Mugabe. Amakombi awasahambi. Izinto sezakhwela intengo. Kunzima abantu bayahlukuluzwa asibona mehluko phakathi kuka Mugabe lo Mnangagwa abantu bayadubeka”
Kodwa umsekeli womholi womsebeni kubandla le ZANU PF uMnu Mabutho Moyo uthi uMnangagwa uselethe inguquko enkulu lokhe wathathayo intambo zombuso.
“Umnotho wethu uyathuthuka kakhulu. I World Bank itshilo ukuba umnotho wethu uzathuthuka kungelani lokuba sibe lo mkhuhlane we Covid-19. Kube lenguquko enkulu kuleli ngenxa yemizamo ka Mongameli Mnangagwa”
Omunye osekela ibandla le ZANU PF uMnu Munashe Mtutsa uthe uMongameli Mnangagwa uyawahlonipha amalungelo oluntu.
“UMongameli Mnangagwa usengumuntu oseguqule okunengi wenza ukuba sibe lemali yethu. Ungumuntu oosenze ukuba kube lula ukwenza ibhizimusi kuleli ngenxa yendlela enze ngayo”
Inengi lengcwethi ezicubungula ezombusazwe eziphakathi kwelizwe leziphandle kwelizwe zithi uzulu wayekhangelele ukuba ukukhitshwa kuka Mugabe kwakuzathuthukisa inhlalakahle kazulu, impilo ibe lula njalo umnotho uphe amathuba kwabanengi kodwa lokhu kukhanya kuliphupho nje elingasoe lafa lafezeka.
Zisithi njalo uzulu we Zimbabwe usephila nzima ngenxa yokuphela amandla kwemali yakuleli nxa iqathaniswa ledollar leMelika, kuthi intengo yempahla iqhubeka ikhuphuka mihla ngemihla.
Abantu abanengi eZimbabwe bakhala ngokuthi aabayiboni inguquko kulandela ukusuka kuka Mugabe esikhundleni. Ezibhedlela lezikolo kulobunzima ngoba imbadalo yokuthola usizo lokwelatshwa leyemfundo layo ikhuphuka okungeneliswa ngabanengi ngapha iholo lingakhuphuki ukuhambela lalezi ndleko. Bathi njalo izimota zokuhambisa kazitholakali lanxa uhulumende waletha amabhasi awe ZUPCO kodwa akeneli.
Kulokungahlaliseki eZimbabwe ngokwenzakala elizweni kulabanye abathi uMugabe loMnangagwa zimbila zantabanye.
Your browser doesn’t support HTML5
Udaba lombuso kaMongameli Mnangagwa siluphiwa nguMlondolozi Ndlovu