Izakhamizi zako Bulawayo zithi ukhetho lwama primaries lwamabandla ezombusazwe luphambanisa uzulu.
Abanye abantu bathi kumele ukhetho lolu lwenziwe kuseselesikhathi eside sokuthi kwenziwe ukhetho lwelizwe.
Kulabanye abantu abathi ukhetho lwelizwe solwenziwe ngakho-ke kabasoze bazihluphe ngokuvota kukhetho oluqakathekileyo oluzayo. Bathi ukhetho lwama primaries luphambanisa uzulu ocina ecabanga ukuthi akusele olunye olulandelayo.
Kodwa-ke bakhona njalo abathi ukhetho lwama primaries luqakathekile njalo kumele lwenziwe sokuzaqhutshwa olwelizwe.
UNkosikazi Debra Mukasa, omunye walabo abafisa ukuncintisa kukhetho lwalonyaka, uthi ukhetho lwama primaries kumele lwenziwe amabandla ezivalele emawofisini hatshi emphakathini.
Umtshayeli womtshova koBulawayo, uMnu. Sipho Masina, uthi akazwisisi ukuthi kwenzakali ngama primaries. Uthi ukuxabana phakathi kwamalunga amabandla atshiyeneyo kwenza engani solwenziwe ukhetho lwelizwe.
Lokhu kusekelwe nguMnu. Bongani Dube othi kazwisisi indlela okuhlelwa ngayo ukhetho kwele Zimbabwe. Uthi akusacaci ukuthi okuyikho yikuphi.
Esinye njalo isakhamuzi sako Bulawayo, uMnu. Matthew Ndlela, uthi ukhetho lwama primaries luphambanisa abantu abacine becabanga ukuthi ukhetho lolu yilo olukhetha umkhokheli.
Ibandla leZANU PF yilo eselenze ukhetho lwama primaries lobanje kulezinye indawo lapho oluzaphindwa khona ngoba kaluqhutshwanga ngemfanelo.
UMnu. Obert Mpofu, obona ngenhlelo zonke zebandla leli, uthi ukhetho lwama primaries luveze ukuthi basekelwa ngabantu abanengi eZimbabwe.
Uphinde wathi okusobala yikuthi ukhetho lolu luveza njalo ukuthi umuntu uzondwa kumbe uthandwa ngabantu.
Amabandla atshiyeneyo akhangelelwe ukuthi azakwenza ukhetho lwama primaries kungakenziwa ukhetho lwesizwe.
Your browser doesn’t support HTML5
Udaba Esilethulelwe NguBathabile Masuku
Kusenjalo, uMnu. Khaliphani Phugweni, umsekeli wesikhulumeli sebandla leMDC ekhokhelwa nguNkosazana Thokozani Khupe, utshele iStudio 7 ukuthi sebelungiselela ukwethulela uzulu ugwalo lweManifesto oluveza abazekwenzela uzulu.
Your browser doesn’t support HTML5
Ibandla leMDC Elikhokhelwa NguMaKhupe Lilungisela Ukhetho Oluzayo