Abantu koBulawayo babutheni ngoLwesithathu eSt. John Anglican Cathedral enkonzweni yokuvalelisa umuyi uNkosikazi Maria Msika owayengumka muyi owayengumsekeli kamongameli welizwe, uMnu. Joseph Msika.
Izikhulumi emthandazweni wokuvalelisa uNkosikazi Msika zincome umuyi zisithi ubengumuntu olothando ezihlobeni zakhe lakubangane engakhethi muntu.
Umkhokheli weBulawayo Metropolitan, uNkosikazi Eunice Sandi Moyo, uchaze umuyi njengomuntu obelesibindi njalo ekhuthele ekukhokheleni imuli yakhe engelandaba lokuthi umkakhe obengumunye wabalwa impi yenkululeko.
Uthe umuyi ubeyisibonelo esihle kubomama abanengi abenza umsebenzi omkhulu owokulwela inkululeko yelizwe kodwa wayezehlisile impilo yakhe yonke.
Ibhokisi esilesidumbu sikaNkosikazi Maria Msika.
Umalukazana wakhe ugcizelele ngokuthi umuyi ubengumuntu olomusa lothando njalo wayemphethe njengomntanakhe kusukela esenda.
Ngemva komthandazo umzimba kamuyi uhanjiswe eHarare lapha azabekwa khona okugcwatshelwa khona amaqhawe elizwe eNational Heroes Acre.
Umuyi ubhubhe eseleminyaka engamatshumi phose athoba munwe munye-89 njalo utshiye abantwana abathathu, abazukulu lezizukulwane.
Kwezinye indaba koBulawayo umumo welizwe ulokhe usiya usiba nzima ngamandla ikakhulu kwezomnotho. Amapholisa kade ebopha abantu abatshintsha imali emgwaqweni ababizwa ngokuthi ngosiphatheleni.
Omkhulu wamapholisa uStephen Mutamba kavumanga njalo kayiphikanga lindaba kodwa uthe ukubotshwa kwabantu abanjalo yinto ehlala isenziwa ngamapholisa sikhathi sonke.