Uhlelo lokuhlola amabizo kuluhlu lwababhalisele ukuthola ilungelo lokuvota olweVoters’ Roll lugqitshwe ngoLwesibili bebalutshwane abantu abahlole amagama abo kugwalo lolu.
Abanye abafisa ukubhalisela ukuvota bebelokhu bebiselwa muva ngezizatho ezitshiyeneyo.
Ikomishini ebona ngezokhetho eyeZimbabwe Electoral Commission (ZEC) ithi banengi abantu ababiselwe emuva ngalesisikhathi kuhlolwa amabizo kuluhlu lwababhalisele ukuvota ezansi yeMaNdebeleni.
Embikweni owethulwe yiwofisi yeZEC eGwanda, izizatho ezidala ukuthi uzulu abuyiselwe emuva zigoqela ukungabikhona kwamagama kuvoters’ roll, ukuswela isithupha, ukulahleka indawo yokuvotela lokunye.
Abanye ngabathwala izithupha ezidabukileyo loba incwadi zokuhambisa ezingasebenziyo kukanti abanye babiselwe muva ngoba bengazalelwanga eZimbabwe.
Labo abazihambele mathupha ukuyahlola amagama abo kuvoters’ roll bedlula inkulungwane ezingamatshumi ayisikhombisa 73,000 loba nje befika inkulungwane ezingamakhulu amabili lamatshumi amane 240,000 abantu ababhalisele ukuvota esabelweni seZansi yeMaNdebeleni.
UMnu. Thandeko Zinti Mnkandla, owake waba nguMayor weGwanda, uthi indubo ezihlangana lozulu lapho esiyabhalisela ukuvota bekumele zilungiswe phambilini.
“Lokhu ukuthi abantu babiselwa muva ngoba bengela zithupa kumbe zidabukile kumbe ngabantu laba esithi ngabezizweni lakho konke khonalokhu yizinto ezenziwa ngabomo okumele nga zalungisiswa kudala. Udaba loluhlu lwabantu abazavota luvele luzabalathi angazi ukuthi kuzaze kubenini ngoba uhulumende kazimiselanga ukuthi kubelula ukuthi abantu babhalisele ukuvota.”
Isikhulumeli sebandla leZapu, uMnu. Iphithule Maphosa, uthi isikhathi sokuhlolwa kwe voters’ roll sibe sifitshane kakhulu njalo loluhlelo aluqhutshwanga kakuhle.
“Besikhangelele ukuthi mhlawumbe izathatha not less than a month abantu bathole isikhathi sokuthi bayekhangela belungise okulungiswayo, kodwa sibona iZEC inike 11 days kuphela esikubona kuyisikhathi esifitshane kakhulu okutshengisela ukuthi sizaba lama disappointments amanengi ngelanga lokuvota lapho abantu abazathola khona ukuthi akumanga kuhle kuvoters’ roll abanye bazathola bengekho bona becabanga ukuthi bakhona.”
Amazwi akhe agcizelelwe yisikhulumeli sebandla leMDC-T eZansi yeMaNdebeleni, uMnu. Ekem Moyo, othi ukuphambaniswa kwamabizo kazulu yindlela yokuqilibezela.
“IGovernment ayinike sonke isikhathi sokuthi abantu bayenze zonalezo izinto ezizabayenza banikwe imfanelo zabo zokuthi bafinyelele ukuthi bayevota. Siyakwazi ukuthi iZanu iyenze ngabomo ukuthi abanye abantu bacine bengasavotanga, amabizo abanye ephanjaniswe uthole ukuthi omunye umuntu sekuthwa ngumama yena engubaba, kuphanjaniswe lezipele zamabizo yizinto okumele zilungiswe kuseselesikhathi. KuConstitution lilungelo lakho ukuthi uvotele umuntu omthandayo.”
IZEC ithi babeyizigidi phose ezinhlanu - 4,7 million - abantu asebehlole amabizo abo kuluhlu lwababhalisele ukuvota besebenzisa indlela ezitshiyeneyo ilizwe lonke.
Abantu abazinkulungwane ezedlula itshumi -11,000 - bayesulwe kuvoters’ roll ngoba kutholakale ukuthi kudala batshona kukanti abanye bebebhalise baphinda kanengi kuthi abanye inombolo zezithupha zingaqondanga.
Your browser doesn’t support HTML5
Udaba Esilethulelwe NguAlbert Ncube