NgoLwesibili uBulawayo wethuswe yikuhlaselwa kukaNduna Nhlanhlayamangwe Khayisa Ndiweni, koBulawayo bethi kuyazila njalo yikungahloniphi inkokheli yomdabu.
UNdiweni ubikwa eke wethula amazwi angabe ecunule abasekeli bebandla elibusayo awokukhuthaza ukuqhubeka kwezijeziso zenotho ezetheswa uhulumende we Zimbabwe ngamazwe athuthukileyo, lapho esola uhulumende ngokwabela indawo elentaba eyeNtabazinduna, kuMnu Floyd Ambrose.
Intaba yeNtabazinduna, iqakathekile kakhulu embalini yabantu bosendo lweMandebeleni ngoba kulapho okwafikela iNkosi yabo uMzilikazi kaMashobane ngakhoke bekungamelanga ibe yingxenye yephulazi elabelwa umuntu, kusephula imithetho ephathelane lezamasiko, kutsho uNdiweni.
UChief Nhlanhlayamangwe Ndiweni oweNtabazinduna
Abanye bayamsola ngalamazwi okukhuthaza ukuqiniswa kwezijeziso zenotho kodwa inengi labantu beMandebeleni bayamsekela bethi kumqoka akukhulumayo.
Olwela amalungelo oluntu, uMnu Effie Ncube usole kakhulu ukuhlukuluzwa kukaNduna ethi kulihlazo.
"Ukuhlaselwa lokwethusela iNduna ngamanyala, akukhondawo emhlabeni okunje okuvunyelwa khona abantu abalemibono ehlukeneyo akuliwa labo asisoke sikwamukele koBulawayo leZimbabwe. Induna kumele ingavinjelwa ukukhuluma ekufunayo, ngokunjalo siyasola okwenzakeleyo akuhlonitshwe impilo yakhe lesisekelo sombuso kulungiswe ukuma manzonzo kwezomnotho ezweni."
UMnu Mbuso Fuzwayo umabhalane jikelele weIbhetshu Lika Zulu inhlanganiso layo elwela amalungelo oluntu uvumelane loNcube.
“Kulusizi lokhu okwenzakeleyo ikakhulu sikhangele ukuthi iNkosi zomdabu ziyahlonitshwa, kodwa ngemva kokuthunyelwa kwenswelaboya libandla elibusayo ukuhlasela uNduna Khayisa kulihlazo asikwamukeli."
Isikhulumeli sebandla leZAPU, uMnu Iphithule Maphosa uthe njengebandla bayasekela imibono kaNduna uNdiweni.
“Ukuhlukuluzwa kwenduna kubonisa obala ukuba uhulumende ulenkethabetshabi ekubuseni kwakhe kanye lekuhlonipheni iNduna zomdabu."
Ilunga lebandla elibusayo kuCentral Committe yeZANU-PF, owayelilunga ledale lephalamende uMnu Jeseph Tshuma uvumelane leNduna uKhayisa ekubeni lelungelo lombuso eNtabazinduna kodwa esola inkhuthazo yakhe yezijeziso zomnotho ethi lapho uphosisile.
“Udaba lweNduna yethu lunzima kakhulu ukukhala kwakhe akukho phandle komthetho kwezomdabu, iNduna isuke yadlulisa kudaba lokumemezela izijeziso zomnotho ngabe uhlale phansi wakhulumisana loHulumende ngiyamsekela kudaba lwepulazi ngoba ngolwamasiko ethu ngivumelana laye ngisola udaba lwezijeziso zomnotho."
Abantu baveza imibono ehlukeneyo ngokuba uNdiweni abelamandla phezu kwentaba yeNtabazinduna lesimemezelo sezijeziso zomnotho kodwa ngemva kokuhlaselwa kwakhe wethule umbiko enkhundleni yokuxhumana eyebulenjini eye Twitter ethi kabuyeli emuva ngakukhankaselayo lokumela isizwe sakhe saMandebele njalo iNtabazinduna ngeke iphiwe umuntu wokuza ngoba kulakho ukuzaphazamisa imikhuba lamasiko abo. Kodwa uphange wazisa ukuthi impilo yakhe ayikho engozini okwamanje.
Ngemva kwesiga sokuhlukuluzwa kwakhe ngoLwesibili amabandla ezombusazwe aphikisayo lenhlanganiso ezizimeleyo akhiphe imibiko yokusola okumehleleyo afana leMDC ekhokhelwa nguMnu Nelson Chamisa. EleMRP lona selikhiphe abantu abathile ukuba babone ukuthi uNdiweni akulamuntu omhlukumezayo.
Your browser doesn’t support HTML5
Udaba lokuhlaselwa kukaNudba Ndiweni siluphiwa nguAnnahstacia Ndlovu