Asekuzinga eliphezulu amalungiselelo omhlangano webandla leZanu PF oweAnnual People’s Conference ozakwenzelwa eGoromonzi High School esabelweni seMashonaland East.
Abalandeli bebandla leli abazakuya emhlanganweni lo sebeqalisile ukubhalisa amagama abo esikolo lesi kanye leHarare.
Umhlangano lo ozakwenziwa ilizwe libhekane lokugugudeka komnotho okumangalisayo, ulesihloko esikhuthaza ukuthuthukisa umnotho welizwe esithi ‘Modernise, Mechanise and Grow the Economy Towards Vision 2030’.
Kukhangelelwe ukuthi ngoLwesithathu kuzakwenziwa umhlangano wePolitiburo ozalandelwa ngoLwesine ngowe Central Committee kube sokuvulwa okusemthethweni amasango omhlangano lo ngoLwesihlanu.
UMnu. Obert Mpofu, unobhala webandla leZanu PF obona ngenhlelo ezitshiyeneyo, uthi abalandeli bebandla leli bakhangelelwe ukuthi bazaxoxisana ngokuvuselela umnotho welizwe njalo lokulungisa okunengi okuhlupha uzulu.
UMpofu uthi ibandla leli selithethe isinqumo sokuthi kukhethwe uMongameli Emmerson Mnangagwa ukuba nguye yedwa ozalimela kukhetho lukamongameli oluzakwenziwa ngomnyaka ka2023.
Lokhu sokuzondise abanye abantu abathi kuyamangalisa ukuthi ibandla leli lidinga umuntu ozalimele kukhetho olusakhatshana ukwenziwa kulokuthi kuhlolisiswe ukugugudeka komnotho welizwe okwenza abantu baphile nzima.
UMnu. Joseph Tshuma, owebandla leZanu PF, uthi benza konke lokhu belandela isisekelo sebandla leli.
Kodwa-ke uMnu. Edwin Ndlovu, okubandla leMDC elikhokhelwa nguMnu. Nelson Chamisa, labanye abantu abakhulume leStudio 7 bathi lokhu kuveza ukuthi ibandla leli aliselandaba lozulu odla inqweqwe zomlomo.