Izakhamizi zeGwanda zithi uzulu wemaphandleni uncedwa zinhlanganiso ezizimeleyo ngoba uhulumende kenelisi ukuthuthukisa impilo yabo.
Lokhu kuphume emhlanganweni eGwanda ngoLwesibili oweTown Hall obuqoqwe ngumsakawo weVoice of America imanyane lenhlanganiso yeMedia Centre.
UNkosikazi Julieth Nkiwane, owenhlanganiso yabomama eyeWomen Development Association of Zimbabwe, uthi abaziboni inhlelo eziqhutshwa nguhulumende.
Basemhlanganweni eGwanda oqoqwe ngumsakazo weStudio 7
“Nxa kungasabuyanga iNGO ezosincedisa akula olunye uhlelo lukahulumende esilubonayo ngoba nxa sokubuya abanye abantu babuya belande abanye abantu, uhulumende nje ukuthi athi isigaba sami eseNqameni, isigaba sami seMatshetsheni, isigaba sami seBolamba isigaba sami esangaphi asikaluboni sisaludinga.”
Amazwi akhe agcizelelwe nguMnu. Bekezela Maduma Fuzwayo othi akula uhulumende asekwenzile ukuthuthukisa impilo zabantu bemaphandleni selokhu ilizwe labalozibuse.
“40 years sikuIndependence mina ngisuka eGwanda North, akumelanga ukuthi nga sichapha uMtshabezi onje akumelanga nga sihamba ngendlela esihamba ngazo sisiyakithi sikhuluma ngezikolo ezakhiwa ntolontolo ezibuya uphahla luthathwe ngumoya nxa kungasabuyanga amaNGO ezobambabamba akulalutho olwenzakalayo.”
UNkosikazi Lobukhosi Malila, ukhansila kaWard 4 eStanmore, uthi loba zikhona inhlelo eziqhutshwa nguhulumende, zisuka ziphambaniseke ngenxa yokusilela kwemali.
“Sibe sesikhangela ekudleni khonapho,ukudla kukhona emaphandleni kodwa kuyasilela ngoba lubuya lulabanikazi ukuthi lukhangele abadala, izigoga , abadubekileyo kube sekusithi inengi lisala ngaphandle ngoba abantu abathathwayo ngabantu abalutshwane.
Ukhansila kaWard 17 eFumukwe, uMnu. Ephraim Nyathi owebandla leZanu PF, uthi loba umnotho welizwe ungamanga kahle kukhona uhulumende akwenzayo ukunakekela impilo zabantu bemaphandleni.
“Loba sisebunzimeni obunjalo siyandosa kunjalo silwisana lakho ukuthi sikwenze njalo labangane bethu esithi ngama partners labo bayasifakela izandla kokunye okuyabe kuncedisa abantu bethu emakhaya.
UMnu. Khulekani Sithole, obona ngokuqhutshwa kwenhlelo zekhansili yemaphandleni, uthi babhekane lodubo lokusilela kwemali okudala ukuba inhlelo zabo zokunakekela uzulu wemaphandleni zingahambi kahle.
“Imigwaqo esihlanganisa lezinye iziqinti kanye laphakathi kwezigaba kusiya kwesinye uhulumende uphatheke kakhulu ekusixhaseni ekulungiseni imigwaqo ngemva kwezulu elike lana elesiqotho elalidiliza imigwaqo.”
Umsakazo weVoice of America usebenzelana labeMedia Centre unxusa abantu ukuthi baze emhlanganweni ofanayo eLupane ngoLwesithathu emini lapho okuzaxoxiswana ngodaba lombhuqazwe weGukurahundi.