Abantu abacatshangelwa ukuthi ngabasekeli bebandla leZanu PF bachithe umhlangano wokuzwa imbono kazulu phezu komthetho ophakathi kokubunjwa nguhulumende owePrivate Voluntary Organizations Bill, eHarare ngoLwesihlanu.
Le yinto enzakale njalo emihlanganweni efanayo ngoLwesine eChinhoyi laseMasvingo lapho okulimale khona omunye umuntu kwathi abanye babaleka ezindlini zabo besithi bayethuselwa ngemva kokwethula imbono yabo bechothoza lumthetho njalo besithi awumelanga wethulwe.
Emhlanganweni weHarare kuqale kwakhuluma abantu abahlanu abacatshangelwa ukuthi basekela iZanu PF bewuncoma lumthetho, kodwa iwuchithile umuthi inkonyale lapho okukhulume khona umuntu wesithupha, onguye oqale ukuyisola iPVO Bill esithi iyancindezela njalo akumelanga yamukelwe ibe ngumthetho ogcweleyo.
Kulapho abacatshangelwa ukuthi ngabasekeli beZanu PF abaqale khona ukuxokozela bethethisa labo abasola lumthetho besithi kumele baphume eZimbabwe nxa bengafuni ukuhlala khona.
Inhlanganiso ezilwela amalungelo oluntu zithi ungapasiswa lumthetho lidale lePhalamende njalo usayizwe nguMongameli Emmerson Mnangagwa, uzakupha uhulumende amandla okuvala inhlanganiso eziphikisana laye, okuyinto elandulwa nguhulumende esithi ujonge inhlanganiso ezisebenza lezitha zeZimbabwe.
Umkhokheli wenhlanganiso yeMatabeleland Institute for Human Rights uMnu Khumbulani Maphosa utshele iStudio 7 ukuthi ukuchithwa kwemihlangano le kuveza sobala ukuthi ibandla leZanu PF alizimiselanga ukuhlonipha intando kazulu.
Your browser doesn’t support HTML5
Ingxoxo loMnu Khumbulani Maphosa
Kodwa isiphathamandla seZanu PF kugatsha lwabasakhulayo uMnu Taurai Kandishaya ukulandile ukuthi yibo abachithe lumhlangano.