Inkokheli yebandla leZanu PF koBulawayo ithi umuyi uDr Dumiso Dabengwa liqhawe lesizwe elingathandabuzwayo ngakhoke sebecele uMongameli Emmerson Mnangagwa ukuthi amuphe leyo nhlonipho okusemthethweni.
UDr Dumiso Dabengwa ubhubhele eNairobi, kweleKenya, Ngolwesine evela kwele India lapho akade eselatshwa khona. Abantu babuthene emzini wakhe eFourwinds koBulawayo.
Ekhuluma esesililweni eFourwinds umngcinisihlalo weZAPU umnumzana Isaac Mabuka uthi amalungiselelo omngcwabo akakaziwa njalo isidumbu lokhu siseKenya lapho imuli elokhe isalungisa amaphepha.
“Amalungiselelo asikawazisisi kuhle ngoba imuli yiyo ephetheyo. Okwamanje basazise ukuthi umzimba ulokhe useKenya lapho abasalungisa amaphepha. Engxenye engabuya kusasa.”
Ilunga leZANU PF umnumzana Tshinga Dube uthi uMongameli Emmerson Mnangagwa uthe uDabengwa liqhawe elingabuzwayo, ethi yena udabuke kakhulu ngoba bebezwana okumangalisayo lobanje bebekumabandla ezombusazwe ehlukeneyo.
“Ngizwa ubuhlungu obumangalisayo ngobauDabengwa besiseduze kakhulu laloba besisemabandleni ehlukeneyo. Lomongameli uthe uDabengwa liqhawe sibili elingabuzwayo.
Ilunga leZANU PF kuCentral Committee umnumzana Christopher Mdingwa Dube uthi uDabengwa liqhawe elingaphumputhwayo.
“Ubaba uDabengwa ngokumkhangela kwami ngemsebenzi yakhe ayenzayo elwela leli lizwe kufanele ahlonitshwe ngokugcweleyo, yinational hero akuphumputheki.”
Amalungiselelo omgcwabo lokhe angakaziwa ngoba isidumbu lokhe singakafiki eZimbabwe.
Your browser doesn’t support HTML5
Udaba lwesililo sikaDr Dumiso Dabengwa siluphiwa nguBathabile Masuku