Abalwa impi yenkululeko bathi sebefuna ukuthi uhulumende ababhadale inkulungwane ezingamatshumi amahlanu - $500,000 umuntu munye ngamunye.
Abalwa impi laba bethule lokhu emhlanganweni ngempelaviki eChinhoyi University abawenze leziphathamandla zikahulumende ezigoqela umphathintambo wezomvikela, uMnu. Sidney Sekeramayi, umphathintambo wohlangothi olubona ngabalwa impi yenkululeko, uRetired Colonel Tshinga Dube lonobhala wakhe uRetired Brigadier General Walter Tapfumaneyi.
Omunye walabo akade bekhulumela abalwa impi yenkululeko nguMnu. Moffat Marashwa, owayekunhlanganiso yabalwa impi yenkululeko eye Zimbabwe National Liberation War Veterans Association.
UMarashwa uthe isuvumelwano lesi sakubeka sobala ukuthi kumele banikwe imali le kusukela ilizwe lithola uzibuse kuze kube lamhlanje.
Lokhu kusekelwe nguMnu. Douglas Mahiya, osanda kuxotshwa kunhlanganiso le esetheswa icala lokudelela uMongameli Robert Mugabe. UMahiya labanye bakhe bathi kabasoze bakhankasele uMugabe kukhetho lukamongameli oluzakwenziwa ngomnyaka ka2018.
USekeramayi ubaphendule wathi uzakhulumisana leziphathamandla zikahulumende ngodaba lolu.
Ngomnyaka ka1997 abalwa impi yenkululeko bekhokhelwa ngumuyi uChenjerai Hunzvi bathwalisa nzima uMugabe waze wabanika inkulungwane ezingamathumi amahlanu - $50,000 umuntu munye ngamunye.
Lokhu kwahle kwaphosa kwabhidliza umnotho welizwe olokhe ungakhanya ungenzi kahle.