Phansi kukahulumende kaMongameli Joe Biden, abake baba ngamabutho eMelika sebethole inhlelo zokwelatshwa ezibiza imali engamabhiliyoni phose ayisithupha, US$5.7 billion.
Kodwa owake waba nguMongameli uMnu Donald Trump uthi abantu laba babephila ngcono kakhulu ngesikhathi esabusa. Kuloludaba sikhangela izikhalazo abalwa impi abazazethulela lowo ozanqoba kukhetho lukaMongameli.
Asebasuka kubutho abaphose bangene kusigidi, 890,000 ababa sengozini yokuchayeka ezintweni eziletshefu ngesikhathi besemsebenzini sebathola uncedo phansi kwePACT Act, okungumthetho owasayinwa nguMongameli Biden ngo2022 ngenjongo yokuqhelisa inhlelo zempilakahle kulabo abalimalela empini kanye labasindayo.
Ngolwesithathu, uBiden wazise ukuthi kulezicelo ezedlula isigidi, 1 million, zabantu abafuna uncedo phansi kwePACT Act esezivunyelwe.
Uthe, “Ukuphefumula nzima, imvukuzane yobuchopho, abantu abasebuhlungwini obukhulu. Akulasidingo sokuthi uveze ubufakazi bokuthi wathola umkhuhlane olawo usesisotsheni, sibonga umthetho wePACT Act, asisekho lesi sidingo.”
UBiden ugcizelele ukuthi phansi kombuso wakhe kulemithetho edlula amatshumi amathathu, 30, epasiswe ngokubambisana ePhalamende, esekela ababengamabutho, ababanakekeli babo, labasindayo empini.
“Sesengeze inhlelo zokuqeda uhlupho lwababengamabutho abangelandawo zokuhlala, siqhatshe salolonga amakhulu ezisebenzi zezempilakahle ezibona ngomkhuhlane wengqondo ukuze ziphathise ababesempini ukuqeda udubo lokuzibulala,” kutsho uBiden.
UMnu Donald Trump, yena oncintisana loTrump emele ibandla lamaRepublican kukhetho lukaMongameli ngo2024 lonyaka, uthi abalwa impi babephila ngcono ngesikhathi esabusa.
UTrump wakugcizelela lokho kumbiko awethula nge-video enkundleni yeRumble ngoLwezi.
Kutsho uTrump, “Silabantu abalwa impi abedlula inkulungwane ezingamakhulu amathathu, 33,000, kulelilizwe abangelandawo zokuhlala njalo abahluphekayo; kulihlazo lokhu. Sabanceda kakhulu ngesikhathi nginguMongameli, kodwa khathesi akuselancedo abalutholayo.”
UTrump wengeze wathi enganqoba kukhetho aphenduke embusweni, lokho kuzaguquka.
“Ngosuku lwakuqala, ngizasayina umthetho omisza yonke imali edlaliswa nguhulumende kaBiden enakekela abantu abangela maphepha, siyisebenzise ukwakhela abalwa impi izindlu zokuhlala njalo sibatholise inhlelo zokwelatshwa,” kutsho uTrump.
Inhlanganiso yeNational Association of Social Workers income impucuko esithe yabakhona kunhlalakahle yabalwa impi phansi kwemibuso yabo bobabili uTrump loBiden. Isipha umzekeliso kaTrump, ithi waqhelisa inhlelo zokunakekela abantu laba ngaphandle kwalezo eziqhutshwa lugatsha lweU.S. Department of Veterans Affairs.
Kodwa ingxaki zikhona, kutsho uMnu Anthony Estreet, umqondisi wenhlanganiso yeSocial Workers Association.
UEstreet uthe, “Abantu bahlangana lenkinga ezinengi ukuthi bangene kunhlelo zokuthola uncedo. Okunye futhi baphazanyiswa ngamaphepha afunakalayo; kuthatha isikhathi eside njalo ukuthi bafakwe kunhlelo lezi okudalwa yikusilela kwezisebenzi kungatsha ezibhekane lalumsebenzi.”
UEstreet uthe ozanqoba kukhetho lukaMongameli weMelika kuzamele aqakathekise ukutholisa abalwa impi inhlelo zokwelatsha imikhuhlane yengqondo ngoba khathesi ziyasilela lezinhlelo.
Udaba lolu lwethulwe yintathelizindaba yeVOA uVeronica Balderas Iglesias, lwahumutshwa yimi uNtungamili Nkomo.
Your browser doesn’t support HTML5
Udaba Silwethulelwa nguNtungamili Nkomo