Umsebenzi wokuloba amabhuku usubhekane lenhlupho ezinengi ngalezi nsuku zokudhindwa kwengwalo ziphinde zithengiswe okungekho emthethweni ezitaladeni osokutshiya abalobi bengela nzuzo ezwayo abayitholayo elakho ukubaphilisa.
Abalobi bamabhuku bakhala ngokuthi umsebenzi wabo awuselayo inzuzo kubangelwa yimisebenzi yabantu abathengisa amabhuku abo okungekho emthethweni.
Umlobi njalo eyimbongi uChirikure Chirikure
Umlobi eyimbongi umnumzana Chirikure Chirikure uthi umumo wezomnotho oya ulokhe ubhidlika yiwo imbangela enkulu yenkinga ebabhekana lazo.
Uthi kanjalo ingwalo zabalobi beZimbabwe sezitholakala phandle kwelizwe okulabadhindiyo abalokhe besasebenza kodwa kutshiya abasakhulayo elizweni bengaselalo ithuba lokukhwabitha ingwalo ezibhalwa elizweni labo.
Ingwalo ezithengiswa ezithaladeni
Imigwaqo ye Harare igcwele amabhuku athengiswa ngaphandle komthetho.
Osakhulayo u Andrew Chateya uthi ubeka ama cover amabhuku ezitaladeni njengesitshengiselo salokho akuthengisayo ngoba esesabela ukuthathelwa amabhuku la ngama polisa njengoba iyiyo kuphela indlela aphila ngayo.
Umgcinisihlalo wabalobi bengwalo zezifundo uDokotela Samuel Makore uthi njengabalobi sebelwela ukuba beqede kokuphela inkinga yokuthengiswa kwengwalo ngaphandle komthetho I-piracy ngoba iphazamisa imisebenzi yokubhala:
Uqhubeke ethi eminye imizamo yabo yikulwela ukuba abalobi benanzelele izivumelwano abazingenisa kizo ama contract ngoba amanye ecina ebathathela amalungelo abo njalo bekhuthaza ukuvezwa kwe Book Policy njengalokho okwenzakala kwamanye amazwe othola khona uhulumende ebhadalela umlobi imali yokudhindisa amabhuku akhe awakuqala azinkulungwane ezimbili 2000.
Umnumzana Promise Mkhwananzi.
Umqondisi wenhlanganiso yabathengisa ezitaladeni okuyikho okuthengiswa khona amabhuku eye Ziso umnumzana Promise Mkhwananzi uthi inkinga ngumumo womnotho elizweni:
Amapholisa aka manisipala ahlala egijimisana labathengisa emigwaqweni ebathathela abakuthengisayo njengendlela yokwehlisa loludubo kodwa uMakore uthi inkinga ayikho ebantwini abathengisayo kodwa kulabo ababadhindela amabhuku la be photokhopha ethi bakhuthaza ukuba uhulumende ethathe imitshina yonke yabantu abanje inikezwe inhlanganiso zamabhuku labalobi ethi lomthetho we Copyright Act udinga ukuba uguqulwe uvikele lokutshontshelwa kwabalobi ingwalo zabo zithengiswa ebulenjini ku internet bona bengatholi lutho.
UMkhwananzi uthi labalobi labo kumele beveze indlela ezincono zokusebenza ezingabaphathisa.
Abathengisa umculo okuma cd ezithaladeni
Abaculi kuleli ababhekana lobunzima obufanayo bethengiselwa ama cd abo ezitaladeni ngaphandle komthetho bacine abanye babo labo bekhetha ukuzithengisela ezitaladeni abanye bedhinda ama cd athengiswa ngedollar elilodwa.
Uhulumende we Zimbabwe ulazo iziqondiso ezibamba ezamasiko ezeCultural Policy ezihlanganisela ubuncitshi beze Art okugoqela ukubhalwa kwezingwalo okuyinto engavikela abalobi bawo, abaculi labanye.
Your browser doesn’t support HTML5
Udaba lwabalobi abakhala ngokuphanjaniswa komsbenzi wabo siluphiwa nguMark P. Nthambe