Abalimi abahlaliswa kutsha emapulazini aseGwanda bathi babhekane lengxaki ezitshiyeneyo ezidala ukuthi bengalimi ngokugcweleyo. Lokhu kuvezwe emhlanganweni wabalimi beDubane eThornwood East lomphathintambo wezokulima uMnu. Anxious Masuka ngoLwesine obevakatshele kulindawo ukuzohlolisisa isimo emasimini.
Omunye umlimi uMnu. Steven Nyathi uthi lanxa belesifiso sokusebenza ngokugweleyo, akusavumi ngoba sebekhulile kungakho kuyadingeka ukuthi basizwe ngamathalakitha ngesikhathi sokulima.
Lokhu kugcizelelwe nguMnu. Jordan Kukubele othe bafisa ukuthi amabhanga abolekise imali ukuze baqhube inhlelo zokulima.
Abalimi baveze njalo ukukhathazeka okukhulu ngendlela isiphala selizwe eseGrain Marketing Board esiphuza ngayo ukubabhadala nxa sebebahambise izilimo zabo.
Ngalokho, uMnu. Sibonginkosi Mulaudzi uthi kuyadingeka ukuthi imali ebayibhadalwayo ilinganiswe ledola leMelika.
UMnu. Misheck Moyo yena ukhale ngobugwelegwele obezankalayo lapho kulenhlenhlo zikahulumende zokuncedisa abalimi ezifana lokwabelwa inkomo esithi azifiki ebantwini kodwa ziphelela kuziphathamandla.
UMnu. Micah Dube yena uthe udubo olukhulu ababhekane lalo ngolokutshontshelwa izifuyo ezifana lenkomo labobabhemi okudale ukuthi kubenzima ukuthu balime.
UMnu Mkhunjulelwa Ndlovu osaphethe isihlalo somqondisi wezokulima eZansi yemaNdebeleni ubike ukuthi inengi lezivande zokulima ngokuthelezela ezibalisa iGuyu-Chelesa, iSibasa leMakwe kazisebenzi ngenxa yengxaki ezitshiyeneyo.
UMnu. Enock Sibanda ongumlimi omkhulu njalo enguSobhuku weThornwood East thi ukhangelele isivuno esihle.
UMnu. Masuka uncome abalimi beThornwood East ngendlela abalime ngayo esithi sokumele bathathe ukulima njengebhizimusi.
Your browser doesn’t support HTML5
UAlbert Ncube Uyalandisa