Abalandeli bomdlalo wenguqu badaniswe kakhulu yikunqotshwa kweqembu labesilisa elimela ilizwe kumncintiswano owokudinga amaqembu azakuyadlala kumidlalo yezizwe zomhlaba eye2026 World Cup.
Umlandeli womdlalo wenguqu uMncedisi Siziba uthi bekuvele kuzakuba nzima ukuba iqembu leZimbabwe Warriors liphumelele kumidlalo elisanda kuyidlala ngoba amalungiselelo alo awaqhutshwanga kuhle.
“Ngiyayilandelela imidlalo yeqembu lesizwe njalo akusafani lakudala. Lowu umkhuba owokubiza umqeqetshi sekusele insuku ezimbalwa ukuba kudlalwe akumnikezi isikhathi esiyaneleyo ukuba ayakhe iqembu lakhe kakuhle. Kuba lula nxa umqeqetshi ezibizela abadlali njalo khathesi amathuba ethu awokuya kuWorld Cup asenciphile. Sidinga umqeqetshi ozaqhatshwa okwesikhathi eside.”
Owake waba yisiphathamandla senhlanganiso yeZimbabwe Football Association, uSiphambaniso Dube, uthi amalungiselelo eqembu lamaWarriors abefana nje lamandlwane.
“Okuzwisa ubuhlungu yikuba kasenzi amalungiselelo ngemfanelo njalo yonke into esiyenzayo siyithatha kalula size sikunanzelele sekusilimazile enhliziyweni zethu. Iqembu lesizwe kaliphanga isikhathi eseneleyo esokuba umqeqetshi afake olwakhe uphawu. Into ekhona kodwa yikuba inhlanzi iqala ukubola ekhanda njalo kumele sizame ukuntshintsha ukwenza ngoba besikwazi ukuba kumele sidlale kodwa kasizange silungiselele ngemfanelo.”
Intathelizindaba yezemidlalo uAndrew Tambanewako uthi yena uzwela usizi umqeqetshi uJairos Tapera ngoba esenindwe ngodaka
“Uyazi iZimbabwe iyadanisa. Ungakhangela amalungiselelo ethu uzathola ukuthi bekuyingxabangxoza. Ngize ngizwele usizi umqeqetshi uJairos Tapera ngoba sekusolwa yena kodwa yena emsulwa. Abadlali bakhe kabajwayelananga njalo sengathi ungaze usole yena owathi sibuyele siyedlala lamanye amazwe ngoba lokhu kubuhlungu.”
Iqembu leZimbabwe lihlezi emsileni wesibaya sikaGroup C lilemiklomelo emibili ngemva kwemidlalo emine. Imiklomelo emibili liyithole ngemva kokuba ngutshiki lobhanqa leRwanda kanye leNigeria nyakenye ngesikhathi liqeqetshwa nguBaltemar Brito owayengumqeqetshi weqembu leHighlanders.
Ngemva kukaBrito, uNorman Mapeza uke waphiwa iqembu lamaWarriors layadlala eMalawi kodwa ngemva kwalokho bobabili kabawuphiwanga lowo msebenzi, owatholwa nguTapera.