Kulabanye abantu koBulawayo abathi sebesehluleka ukudla kabili kumbe kathathu ngelanga njengenhlalayenza ngenxa yendlala ebangelwe yikungani kahle kwezulu ngesikhathi sokulima.
Abanye babo bebephila ngokuthola ukudla emaphandleni, ukusebenza kumbe ukulima edolobheni.
Abahlali bemadolobheni wonke eZimbabwe bakhala ngobuyanga lendlala abaphakathi kwayo, okungajayelekanga ukuthi kwenzakale. Obekuyinjayelo yikuba indlala ibihlasela abantu emaphandleni, baphephele kwabasedolobheni ngoba bekuvame ukuthi benelise ukubathumezela ukudla.
Lonyaka kukhala lezakhamuzi zemadolobheni kulandela isomiso esidalwe yisikhudumezi somkhathi emhlabeni wonke ese-El Nino. Ugogo uElizabeth Msebele umhlali wakoBulawayo uthi sebatshona ngelambazi emzini wakhe.
"Indlala kuphela, sithwele nzima asidli lutho, abantwana bahamba bedle i-porridge kuphela kube yilo abatshona ngalo. Ngithwele nzima, lokuthi ngizabanikani angazi. Lami ngi lapha nje angidlanga lutho ukusukusela ekuseni, kutshona unjalo uze uyebona isitshwala ntambama lakho izitshebo zakhona sikhulumi. Lonyaka kunzima sure.”
Banengi abakusimo lesi koBulawayo. Abanye sebephila ngokutshaya amakhasi kumbe ezinye indlela ezingaqedakeliyo ukwenzela ukuziphilisa. UNkosikazi Buhlebenkosi Tshuma ophila ngokuthengisa impahla emigwaqeni uthi benza konke okungabanika imali.
“Kunzima kulezi insuku ukuthi imali ihlangane, lawe uziphilise lanxa sithengisa lapha emgwaqweni njalo ngani udubo lolu luya phambili. Abantu sebeze behamba ukuyabheja kuma Bets, bezama ukuthi bangezelele leyi abayitholayo. Ekubhejeni lakho kunzima, abanye bayabamba abanye hayi, uthole ukuthi uzaqeda iviki yonke ubheja kodwa ungatholi lutho.”
Uphenyo olwenziwa yiZimbabwe Livelihoods Assessment Committee ekupheleni kuka Nkwenkwezi lwaveza ukuba kulabantu abafika phose izigidi ezimbili – 1.7 million abakhangelelwe ukuba bazafuna ukudla lonyaka ngenxa yendlala. Inani leli likhangelelwe ukuba selakhuphuka kulandela inhlolisiso eyenziwa zinhlanganiso ezigoqela eyeWorld Food Program, UNICEF lezinye ezathi kulabantu abafika phose izigidi ezilitshumi– 9 million eZimbabwe abaginga uncedo lokudla lonyaka.
Inhlanganiso eyeUNICEF isanda kubika ukuba amabele edlula isilinganiso sokungamatshumi ayisithupha – 60 percent atsha ngesikhathi sokulima ngenxa yokuswelakala kwezulu. EleZimbabwe lidinga amabhiliyoni amabili amadolar eMelika – 2 billion United States dollars yokuthengela abalambayo ukudla.
SEE ALSO:
Udaba Esilwethulelwe NguBathabile Masuku