Abakumpentsheni batshengisele ngokuthula phandle kwemawofisini wohlangothi lweNational Social and Security Authority-NASSA, aweCompensation House, edolobheni lakoBulawayo NgoLwesine, bekhala ngemali zabo abangazitholi ngendlela kanye lokuthi uHulumende ayengezelele ngoba abayithola manje ayisela sisindo.
AbakuPension betshengisela koBulawayo
OMama laboBaba abakumpentsheni bebethe gwaqa betshengisela ngokuthula emawofisini aweNASSA koBulawayo, bekhala ngokuthi izimali zabo abazitholi ngendlela efaneleyo ngakhoke bacela lokhu kulungisiswe njalo zingezelelwe ngoba abayitholayo ayisahambelani lomumo womnotho okhona manje omi manzonzo.
UNkosikazi Sithembiso Mhlanga isakhamuzi sakoBulawayo omunye wabathola impetsheni uthi bayehluleka ukuthola imali zabo emabhanga.
“Ngihola imali yomkami owayesebenza eBelmont Printers uhlupho ibhanga lipha inumber kubantu abakhubazekileyo labaphilileyo abangamakhulu amahlanu okuyibo abazathola imali NgoMvulo, kunje lokhe singakaholeli inyanga yonale njalo abatsho ukuthi imali yethu sizayithola nini.”
Esinye njalo isakhamuzi sakoBulawayo uNkosikazi Elizabeth Kamoto ucela uhulumende ukuba angenele kudubo lokuswela imali emabhanga.
"Ngiyiswele imali ebhanga, kunje ngizelapha ngisuka ekhaya ngemali yokuboleka, bathi ngibuye NgoMvulo kodwa vele anila eyokuza nalelolana njalo ngilabantwana, siyaswela ngicela uHulumende asincedise sicela basitshele iqiniso abeNASSA."
UMnumzna Gee Ncube uthi imali ayitholayo ayihambelani lemali ayeyikhupha ngesikhathi esasebenza.
“Iminyaka yami enayisebenzayo eyi42 ayihambelani lempentsheni engiyitholayo ayincedi lutho khonapha edolobheni, esikolo lekhaya lakho yindlala imali esiyitholayo ayisathengi lutho sicela uHulumende angezelele imali yethu inathi ithi thuthu."
AbakuPension betshengisela emawofisini aweNASSA
UMnu. Stanley Ndlovu uthi ngesikhathi ebhadala impentsheni esasebenza ubeyibhadala ngedola leMelika.
“Ngesikhathi sikhupha imali yempentsheni sisasebenza sasiyikhupha ilidola leMelika kodwa manje sebesibhadala i$80 bond note encane kakhulu sicela iNASSA ilungise loludaba.''
UMnu David Moyo uthi sebephila nzima njalo kabaphathwa kuhle lapho bedinga ingcazelo kwabeNASSA lasemabhanga.
“Imali asiyitholi emabhanga bathi sisebenzise imali ebulenjini, basiphatha kubi njalo thina imali yethu sayikhupha ilidola lemelika kodwa sebesipha imali yebond note engelasisisndo, abafelokazi bathola amatshumi amathathu amadola.''
Inengi labantu abatshengisele lamhlanje emawofisini aweNASSA bebekhala ngokungaphathwa kuhle emabhanga lasemawofisini la, kanye lokudlelwa imali zabo, bethi bavele abayitholi ngendlela imali yabo njalo ayiselasisindo esifana lalapho besayikhupha ilidola leMelika ngesikhathi besasebenza.
Abatshengiselayo bacele ukuba uhulumende akhuphule imali yempentsheni ayipha abantu ngoba umumo womnotho ezweni zimi manzonzo.
Izisebenzi zemawofisini wohlangothi olweNASSA koBulawayo zalile ukukhuluma leStudio 7 mayelana lokutshengisela kwabantu laba bethi abalalungelo lokukhuluma lentathelizindaba.
Your browser doesn’t support HTML5
Udaba lwabakumpentsheni abatshengisele koBulawayo siluphiwa nguAnnahstacia Ndlovu