Behlukana ngemibono abahlali bedolobho lako Bulawayo phezu kobudlelwano beZimbabwe lele China osokulethe impahla enengi elizweni ebikwa ingela hlonzi inengi abayibiza ngokuthi ngama zhing zhongu.
Abanye babeka ele China umlandu wokuphazamisa umnotho weZimbabwe ngokuletha lezi mphahla ezingela hlonzi ezile ntengo ephansi osokulimaze amankampani ngoba elendleko enkulu yokulungisa imphahla, ethi isithengiswa ibe lentengo ephezulu kulaleyo evela eChina.
Kube labanye abemukela ngenjabulo limpahla yakwele China ngoba ilentengo eyeneliswa ngumuntu wonke kungakhathalekile ukuba uyasebenza loba hatshi.
Amavinkili abakweleChina eZimbabwe
Unkosazana Sithabile Ngwenya yintombazana esanda qeda ukuloba imihloliso kaForm Six ensukwini ezisanda kwedlula.
Isifiso sakhe ngesokuba ngomnyaka ozayo aqhubekele phambili ngezifundo zakhe ayefunda enyuvesi kodwa umgoqo omkhulu abhekane lawo ngowokuba abazali bakhe bathi abalayo imali yokuba eqhubekele phambili loba engabe ephumelele kumihloliso yakhe.
Osekusipha uSithabile ithemba yikuba uke wathi ebala iphephandaba ensukwini ezedluleyo wahlangana lodaba oluthi kulamankampani aselizweni lase China athembise ukuba azaphathisa izifundi zase Zimbabwe ngosekelo lwemali ngaphansi kohlelo lwe Presidential Scholarship Fund.
USithabile uthi yena labo abazathola ithuba lokuyafunda kwele China balakho ukuphenduka bezothuthukisa ele Zimbabwe ngoba ele China lingelinye lamazwe emhlabeni jikelele athuthuke kakhulu kwezomnotho.
Izifundi zemakolitshini amaUniversity akwele Zimbabwe zikhokha phose amakhulu ayisithupha zamadola eMelika nge semester, okuyimali ephezu kweholo lezisebenzi ezinengi elizweni.
Okulungiswa kweleChina
Unkosikazi Musa Nyoni, yena ophila ngokuthengisa okutshiyeneyo ezitaladeni zedolobho lako Bulawayo, uthi usekhulise abantwabakhe ngokuthenga impahla ezitshiyeneyo ezitolo zama China abesezithengisela abanye abantu. Uthi yena yebo kambe abanye bengakhala ngohlonzi lwempahla zase China kodwa lezimpahla ziphathisa kakhulu labo abazihluphekelayo.
UMaMguni yena akavumelani lonkosikazi Nyoni njalo uthi ukutholakala lula kwempahla ze China kudale ukutshabalala kwamankampani amanengi awe Zimbabwe afana labo Kango ngoba ezabo impahla besezingasathengwa aqala ngokumisa abantu umsebenzi acina esevalwa.
Kango
USamkele Hadebe, oke wahlala kwele China njalo ofundisa ulimi lwesi Mandarin emakolitshini aphezulu, uthi akulanto embi ngokuba khona kwama China elizweni kodwa imithetho yelizwe kumele ivikele uzulu kanye lamankampani avele ekhona elizweni.
Ukwethekelela kukamongameli Xi Jinping wele China eZimbabwe okwensuku ezimbili ezedluleyo kulethele uhulumende ithemba ukuba luzakwengezwa uncedo oluvela kulelo lizwe ethi lesi yisibonelo esokuba ubudlelwano phakathi kwalawa mazwe womabili buyaphambili buqina njalo lungaletha amathuba amanengi okuthuthukisa umnotho welizwe.